Krunal Hardik Relation : “तुमचा सख्खा भाऊ जर…”, क्रृणाल पंड्याने अखेर हार्दिकसोबतच्या नात्यांबद्दल सोडलं मौन
Krunal Hardik Relation : गेल्या काही महिन्यांपासून क्रृणाल पंड्या आणि त्याचा लहान भाऊ हार्दिक पंड्या यांच्यात कौटुंबिक वाद किंवा काहीतरी बिनसल्याच्या जोरदार चर्चा क्रिकेट वर्तुळात रंगत होत्या, त्यावर आता क्रृणाल पंड्याने प्रतिक्रिया दिली आहे.
Krunal Pandya Breaks Silence about Hardik Pandya : रॉयल चॅलेंजर्स बंगळुरु संघाने सलग दुसऱ्यांदा आयपीएल २०२६ चे जेतेपद पटकावून इतिहास रचला आहे. तब्बल १८ वर्षांच्या प्रदीर्घ प्रतीक्षेनंतर आरसीबीच्या वाट्याला आलेले हे सलग दोन मोठे विजय फॅन्ससाठी सुखावणारे ठरले. आरसीबीच्या या विजयात अष्टपैलू क्रृणाल पंड्या याने मोलाचे योगदान दिले. मात्र, गेल्या काही महिन्यांपासून क्रृणाल पंड्या आणि त्याचा लहान भाऊ हार्दिक पंड्या यांच्यात कौटुंबिक वाद किंवा काहीतरी बिनसल्याच्या जोरदार चर्चा क्रिकेट वर्तुळात रंगत होत्या. आता आरसीबी चॅम्पियन बनल्यानंतर कृणालने या सर्व अफवांवर आणि त्यांच्या नात्यावर थेट भाष्य केले आहे.
मैदानावरील दुरावा आणि पंड्या ब्रदर्समधील वादाची चर्चा!
आयपीएल आणि भारतीय संघाकडून खेळताना पंड्या बंधूंची घट्ट केमिस्ट्री नेहमीच चाहत्यांचे लक्ष वेधून घेते. मात्र, यंदाच्या संपूर्ण आयपीएल मोसमात दोन्ही भावंडांचा एकत्र एकही व्हिडीओ किंवा फोटो समोर आला नाही. एवढेच नव्हे तर, सामन्यादरम्यान एकमेकांशी हस्तांदोलन करतानाही दिसले नाहीत. त्यामुळे दोन्ही भावांमध्ये मोठी फूट पडल्याची चर्चा सोशल मीडियावर सुरू होती.
आमच्या घरात आता १० आयपीएल ट्रॉफी –
या सर्व वादावर पडदा टाकताना कृणाल पंड्याने ‘टाइम्स ऑफ इंडिया’ला दिलेल्या मुलाखतीत सांगितले, “आम्ही दोघेही एकत्र क्रिकेट खेळलो आहोत आणि आजही खेळत आहोत. त्यामुळे क्रिकेटमधील तांत्रिक आणि रणनीतिक बाबींवर आमच्यात नेहमीच चर्चा होते. आमच्यातील या चर्चा नेहमीच खूप उपयुक्त आणि सकारात्मक असतात. आम्ही एकमेकांचा खेळ अधिक कसा सुधारता येईल, याच विचारांची देवाणघेवाण करतो. तुमचा सख्खा भाऊ जर त्याच खेळाचा भाग असेल, तर एकमेकांना समजून घेणे खूप सोपे होते. सर्वात महत्त्वाची गोष्ट म्हणजे, पंड्या कुटुंबात आता तब्बल १० आयपीएल ट्रॉफी आल्या आहेत.”
🚨🗣️ KRUNAL PANDYA ON HIS BOND WITH HARDIK PANDYA
“We’ve always discussed cricket — tactical and technical stuff. When your brother is also playing the same sport, it helps each other in a way.
It has always been a healthy conversation about cricket and how we can get better.… pic.twitter.com/EcbJhGG4Rk
— TheWicketReport (@WicketReport) June 4, 2026
पंड्या हाऊसमध्ये ट्रॉफीचे ‘अक्षय’ शतक!
विशेष म्हणजे, क्रृणाल आणि हार्दिक या दोन्ही भावंडांच्या नावावर आता प्रत्येकी ५-५ आयपीएल ट्रॉफीज झाल्या आहेत. हार्दिक पंड्या २०१५ मध्ये मुंबई इंडियन्सच्या विजेत्या संघाचा भाग होता. तर कृणालने २०१६ मध्ये मुंबईकडून पदार्पण केले. यानंतर पंड्या ब्रदर्सने मुंबई इंडियन्सला २०१७, २०१९ आणि २०२० मध्ये चॅम्पियन बनवण्यात मुख्य भूमिका बजावली.
२०२१ नंतर क्रृणाल मुंबईतच राहिला, तर हार्दिकने नव्याने स्थापन झालेल्या गुजरात टायटन्सचे कर्णधारपद सांभाळत पहिल्याच वर्षात संघाला ट्रॉफी जिंकवून दिली. त्यानंतर हार्दिक पुन्हा मुंबई इंडियन्समध्ये कर्णधार म्हणून परतला. मात्र, यंदा पाच वेळच्या चॅम्पियन मुंबईला गुणतालिकेत तळाच्या स्थानावर समाधान मानावे लागले. त्यामुळे आता हार्दिककडून मुंबईचे कर्णधारपद काढून घेतले जाण्याची शक्यता वर्तवली जात असतानाच, भावाच्या यशावर क्रृणालने दिलेले हे उत्तर चर्चेत आले आहे.
