Russian Missile Attack : रशियने क्षेपणास्त्रे आणि ड्रोननी रात्रभरात युक्रेनची राजधानी कीव्ह आणि इतर डझनभर प्रदेशांवर जोरदार मारा (Russian Missile Attack) केला. त्यात चार मुलांसह १९ नागरिक ठार झाले आणि सुमारे ६० जण जखमी झाले.

उत्तरेकडील चेर्निहिव्ह प्रदेशातील प्रिलुकी या भागाला सर्वाधिक फटका बसला.तिथे रशियाच्या हल्ल्यात एक अपार्टमेंट इमारत उद्ध्वस्त झाली, त्यात चार मुलांसह १३ जण ठार झाले आणि सुमारे ५० जण जखमी झाले.

कीव्ह आणि इतर शहरांमध्येही हल्ले झाले. क्रेमेन्चुकमध्ये दोन जण ठार आणि सात जण जखमी झाले, असे युक्रेनच्या अधिकाऱ्यांनी सांगितले. रशियाने एक मोठा आणि हेतुपुरस्सर हल्ला केला आहे. रशियच्या बॅलिस्टिक क्षेपणास्त्रांचा (Russian Missile Attack) सामना करण्यासाठी युक्रेनला अधिक हवाई-संरक्षण प्रणाली, विशेषतः पॅट्रियट क्षेपणास्त्रांची तातडीने गरज आहे, असे युक्रेनचे अध्यक्ष व्लादिमीर झेलेन्स्की म्हणाले.

रशियाच्या सैन्याने युक्रेनच्या संरक्षण-औद्योगिक सुविधा, तसेच ओडेसा प्रदेशातील बंदर आणि जहाज-दुरुस्ती सुविधांना लक्ष्य केले असल्याचे रशियाच्या संरक्षण मंत्रालयाने सांगितले. दुसरीकडे युक्रेनने रशियाच्या हद्दीतही तेल सुविधा आणि लष्करी तळांना लक्ष्य करून लांब पल्ल्याचे हल्ले सुरूच ठेवले आहेत.

रशिया आणि युक्रेन यांच्यात दीर्घकाळापासून हवाई हल्ले (Russian Missile Attack) सुरू आहे आणि राजनैतिक प्रयत्नांतून हा संघर्ष तात्काळ संपुष्टात येण्याची शक्यता कमी असतानाच रशियाकडून नव्याने हे हल्ले झाले आहेत.