वॉशिंग्टन – अमेरिकेचे राष्ट्राध्यक्ष जो बायडेन यांनी युक्रेनला रशियात खोलवर मारा करण्यासाठी अमेरिकेने पुरवलेली लांब पल्ल्याची क्षेपणास्त्रे वापरण्याची परवानगी दिली आहे. आता शस्त्रास्त्रांवरील निर्बंध शिथिल करण्यात आले आहेत.

अमेरिकेच्या एका अधिकाऱ्याने दिलेल्या माहितीनुसार, रशिया आपल्या युद्धाला बळ देण्यासाठी हजारो उत्तर कोरियाचे सैन्य तैनात करत असल्याने असे करण्यात आले आहे. कीवला रशियाच्या आत लांब पल्ल्याच्या हल्ल्यांसाठी आर्मी टॅक्टिकल मिसाइल सिस्टम वापरण्याची परवानगी देण्याचा निर्णय अध्यक्ष व्लादिमीर पुतिन यांनी उत्तर कोरियाच्या सैन्याला युक्रेनच्या उत्तर सीमेवर तैनात केल्यामुळे घेण्यात आला आहे.

युक्रेनच्या सैन्याने ताब्यात घेतलेला शेकडो मैलांचा प्रदेश परत मिळवण्यासाठी पुतिन यांनीही आपले प्रयत्न तिव्र केले आहेत.
दरम्यान, बायडेन यांनी उचललेले हे पाऊल डोनाल्ड ट्रम्प यांच्या अध्यक्षीय निवडणुकीतील विजयानंतर उचलण्यात आले होते. एकीकडे ट्रम्प यांनी म्हटले आहे की ते युद्ध लवकर संपवतील आणि त्यांचे प्रशासन युक्रेनसाठी अमेरिकेचे महत्त्वपूर्ण सैन्य समर्थन चालू ठेवेल की नाही याबद्दल अनिश्चितता निर्माण केली आहे त्यानंतर बायडेन यांची ही कृती अगदी ट्रम्प यांच्या विरोधातील मानली जाते आहे.

युक्रेनचे राष्ट्राध्यक्ष वोलोडिमिर झेलेन्स्की आणि त्यांचे अनेक पाश्चात्य समर्थक अनेक महिन्यांपासून बायडेन यांच्यावर पाश्चात्य देशांनी पुरवलेल्या क्षेपणास्त्रांनी रशियाच्या अंतर्गत लष्करी लक्ष्यांवर हल्ला करण्याची परवानगी देण्यासाठी दबाव आणत आहेत. अमेरिकेच्या निर्बंधांमुळे युक्रेनचे नुकसान झाले आहे त्यामुळे युक्रेनवरील रशियन हल्ले थांबवण्याचा प्रयत्न करणे अशक्य झाले आहे असा आक्षेप त्यांच्याकडून घेतला जात होता.