Russia-China Naval Drill : दक्षिण चीन समुद्रात लष्करी सराव एवढ्या प्रमाणात होत आहेत की ते युद्धभूमी बनत आहे. दक्षिण चीन समुद्राबाबत चीन आणि फिलीपिन्समध्ये प्रचंड तणाव आहे. याशिवाय इतर अनेक देशही या भागावर आपला हक्क सांगतात, तर दुसरीकडे चीन दक्षिण चीन समुद्रावर आपला दावा सांगतो. आता चीन आणि रशिया दक्षिण चीन समुद्रात संयुक्त लष्करी सराव करत आहेत. चीन आणि रशियाने या भागात लाइव्ह फायर नौदल सराव केला असून याव्दारे थेट अमेरिकेला आव्हान दिल्याचे म्हटले जात आहे. यापूर्वी या भागात 26 देशांनी लष्करी सराव केला आहे. दुसरीकडे, अमेरिका आणि फिलीपाईन्सने संयुक्तपणे फिलिपाईन्सच्या समुद्रात गस्त घातली आहे.

चीनच्या सरकारी मीडियाने म्हटले आहे की, दक्षिण चीन समुद्राच्या एका अज्ञात भागात दोन्ही देशांच्या सैन्याने लष्करी सराव केला होता. अमेरिकेच्या निर्बंधानंतर दोन्ही देशांनी आपले व्यापारी संबंध दृढ केले आहेत. रशियाच्या संरक्षण मंत्रालयाने आठवड्याच्या सुरुवातीला टेलिग्राम मेसेजिंग ॲपवर या नौदल सरावाची माहिती दिली होती. मंत्रालयाने सांगितले की, चीनच्या झांजियांग बंदरात ‘मेरिटाइम कोऑपरेशन – 2024’ या नौदल सरावाचे उद्घाटन करण्यात आले. रशियाच्या संरक्षण मंत्रालयाने सांगितले की, या सागरी सरावात रशियाच्या पॅसिफिक फ्लीट आणि पीएलए नेव्हीची जहाजे सहभागी होणार आहेत.

नौदल सरावात पॅसिफिक फ्लीटच्या तुकडीचा समावेश…

रशियाच्या आरआयए (RIA) राज्य वृत्तसंस्थेने दिलेल्या माहितीनुसार, या सरावात चीन आणि रशियाच्या नौदलाने संयुक्त सरावाचा एक भाग म्हणून तोफाव्दारे गोळीबार केला. या सरावात रशियाच्या पॅसिफिक फ्लीटची एक तुकडी सहभागी झाली होती. ज्यामध्ये रेझकी आणि ग्रोम्की या दोन कॉर्वेट्सने भाग घेतला. या सरावादरम्यान चीन आणि रशियाने उत्तर पॅसिफिक समुद्रातही गस्त घातली.

Russia Ukraine War : अमेरिकन एफ-16 फायटर जेट पाडा अन् मिळवा 1.41 कोटींचे बक्षीस….

रशिया आणि चीनला झाला फायदा…

चीनच्या सीसीटीव्ही न्यूजने पीएलए नेव्हीच्या हवाल्याने म्हटले आहे की, चीन-रशिया संयुक्त गस्तीने दोन्ही देशांमधील अनेक दिशा आणि क्षेत्रांमध्ये सखोल आणि व्यावहारिक सहकार्याला प्रोत्साहन दिले आहे. दोन्ही देशांच्या नौदलांनी सागरी धोक्यांना प्रभावीपणे उत्तर देण्याचे कौशल्य आत्मसात केले आहे. पीएलए नौदलाने सांगितले की, या सरावात सहभागी होणारी जहाजे सोमवारी दक्षिण चीनमधील ग्वांगडोंग प्रांतातील झांजियांग येथून रवाना झाली.