Satara: सार्वजनिक बांधकाम मंत्री शिवेंद्रसिंहराजे भोसले यांच्या पाठपुराव्यामुळे येथील छत्रपती संभाजी महाराज शासकीय वैद्यकीय महाविद्यालयाच्या बालरोग चिकित्साशास्त्र विभागाकरिता यंत्रसामुग्री व साधनसामुग्री (टर्न की सहित) खरेदीसाठी १३ कोटी ५० लाख रुपये निधी मंजूर झाला आहे. याबद्दल मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार व वैद्यकीय शिक्षण मंत्री हसन मुश्रीफ यांचे ना. शिवेंद्रसिंहराजे यांनी आभार मानले आहेत.

येथील छत्रपती संभाजी महाराज शासकीय वैद्यकीय महाविद्यालय व रुग्णालय उभारणीसाठी महत्वपूर्ण योगदान देणारे शिवेंद्रसिंहराजे भोसले यांचा मेडिकल कॉलेज व रुग्णालय लवकरात लवकर सुरु होऊन त्याचा जनसामान्यांना लाभ व्हावा, मेडिकल कॉलेज व रुग्णालयाच्या सर्व इमारतींचे बांधकाम पूर्ण व्हावे आणि या कॉलेज व रुग्णालयातील सर्व विभाग पूर्ण क्षमतेने सुरु व्हावेत यासाठी ना. शिवेंद्रसिंहराजे भोसले यांचा पाठपुरावा सुरु आहे. त्यातूनच वैद्यकीय शिक्षण व औषधी द्रव्ये विभागामार्फत मेडिकल कॉलेज, रुग्णालयातील बालरोग चिकित्साशास्त्र (एनआयसीयू) विभागासाठी आवश्यक असणारी यंत्रसामुग्री व साधनसामुग्री (टर्न की सहित) खरेदीसाठी १३ कोटी ५० लाख रुपये निधी उपलब्ध झाला आहे.यासाठी प्रशासकीय मान्यता देण्यात आली आहे. या निधीमधून कॉलेज- रुग्णालयातील बालरोग चिकित्साशास्त्र विभागासाठी आवश्यक यंत्रसामुग्री व साधने खरेदी करण्याचा मार्ग मोकळा झाला आहे. हे मेडिकल कॉलेज आणि रुग्णालय तातडीने सर्व सोयी सुविधांनी परिपूर्ण होणे आवश्यक आहे. त्यासाठीच आपण राज्य सरकारकडे पाठपुरावा करत आहोत, असे ना. शिवेंद्रसिंहराजे यांनी यानिमित्ताने स्पष्ट केले.