Rohini Khadse : पुण्यातील रेव्ह पार्टी प्रकरणामुळे राज्यभरात खळबळ उडाली आहे. गेल्या काही दिवसांपासून या प्रकरणाची राज्यभरात जोरदार चर्चा सुरू आहे. या प्रकरणात पुणे पोलिसांनी सात जणांना अटक केली आहे. पोलिसांनी शरद पवार गटाचे आमदार एकनाथ खडसे यांचे जावई डॅा. प्रांजल खेवलकर यांना रंगेहाथ पकडले. यानंतर राजकीय वर्तुळात मोठी खळबळ उडाली आहे. प्रांजल खेवलकरांच्या जामिनासाठी मार्ग मोकळा झाल्याचे बोललं जात होते. मात्र, या प्रकरणातील चार जणांना १४ दिवसांची न्यायालयीन कोठडी पुणे जिल्हा न्यायालयाने सुनावली आहे. त्यामुळे खेवलकरांच्या अडचणी वाढल्या आहेत. अशातच आता त्यांच्या पती आणि शरद पवार गटाच्या महिलाप्रदेशाध्यक्ष रोहिणी खडसे यांनी शरद पवार यांची भेट घेतली आहे. या भेटीनंतर त्यांनी माध्यमांशी संवाद साधला आहे. या सर्व प्रकरणात मी योग्यवेळी उत्तर देणार असल्याचं त्या म्हणाल्या. काय म्हणाल्या रोहिणी खडसे? मी योग्य वेळी प्रत्येकाला उत्तर देणार आहे. पोलिसांनी सांगितले की, पाळत ठेवणे हा आमचा हेतू नव्हता. त्यांनी त्यांच्या वतीने आम्हाला भेट घेऊन हे सांगितलं. तुम्ही मला त्या केस संदर्भात न्यायालयात जी चर्चा झाली ते मला विचारू नका. विरोधी पक्षातील नेत्यांना टार्गेट केले जातं, असं म्हणायला जागा असल्याचं त्यांनी सांगितलं. त्यांनी पोलिसांवर गंभीर आरोप केले आहेत. पुणे पोलिसांच्या विरोधात आपण कोर्टात जाणार असल्याचं त्या म्हणाल्या आहेत. पुणे पोलिस कोणाच्यातरी सांगण्यावरून काम करत असल्याचे त्यांनी म्हटलं आहे. पोलिसांच्या कारवाईवर देखील त्यांनी संशय व्यक्त केला आहे. यामुळे या प्रकरणावर शरद पवार काय भाष्य करणार हे पाहणे महत्वाचे असणार आहे. खेवलकरांच्या मोबाईलमधील चॅट उघड पुणे पोलिसांनी या प्रकरणात अटकेत असलेल्या डॅा. प्रांजल खेवलकर यांच्या मोबाईलमध्ये आक्षेपार्ह चॅट आणि व्हिडीओ सापडले असल्याची माहिती दिली आहे. त्यांनी दुसऱ्या आरोपीला असा माल पाहिजे असे म्हटले आहे, त्यामुळे खेवलकरांचा पाय आणखी खोलात गेला आहे. पोलिसांनी रेव्ह पार्टीवर छापा टाकल्यानंतर मोठी कारवाई केली होती. या छापेमारीत पोलिसांना कोकेन आणि गांजा हे अंमली पदार्थ मिळून आले.
