पुणे : पुणे ड्रग्स पार्टी प्रकरणात राष्ट्रवादीचे नेते एकनाथ खडसे यांचे जावई प्रांजल खेवलकर यांना पोलिसांनी अटक केली असून, आज त्यांना पुन्हा न्यायालयात हजर करण्यात आले. दोन दिवसांची पोलीस कोठडी संपल्यानंतर या प्रकरणातील सातही आरोपींना न्यायालयात आणण्यात आले. विशेष म्हणजे, खेवलकर यांच्या पत्नी रोहिणी खडसे स्वत: वकिली पोशाख घालून पतीची बाजू मांडण्यासाठी कोर्टात हजर झाल्या. यावेळी त्यांनी पुणे पोलिसांवर गंभीर आरोप केले. न्यायालयात सरकारी वकील आणि आरोपींच्या वकिलांमध्ये तुंबळ युक्तिवाद झाला. तपास अधिकाऱ्यांनी सांगितले की, सर्व आरोपींच्या घरी छापेमारी करून अनेक इलेक्ट्रॉनिक उपकरणे जप्त करण्यात आली आहेत. तसेच, आरोपींचे रक्त आणि लघवीचे नमुने तपासासाठी प्रयोगशाळेत पाठवले असून, त्यांचे अहवाल येणे बाकी आहे. तपासात राहुल नावाचा एक नवा आरोपी समोर आला आहे, जो हुक्का भरत होता आणि तीन दिवस त्या ठिकाणी उपस्थित होता. त्याचा शोध सुरू आहे. तपास अधिकाऱ्यांनी असा दावा केला की, आरोपी अमली पदार्थ कोठून आले याबाबत एकमेकांकडे बोट दाखवत असून, तपासात सहकार्य करत नाहीत. त्यांनी दोन महिला आरोपींना न्यायालयीन कोठडी, तर उर्वरित पाच जणांना पोलीस कोठडी देण्याची मागणी केली.
