Riyan Parag Shoulder Surgery : आयपीएल २०२६ मध्ये राजस्थान रॉयल्स संघाचे यशस्वी नेतृत्व करणाऱ्या आणि भारतीय क्रिकेटचा उगवता तारा असलेल्या रियान पराग याच्याबाबत एक अत्यंत मोठी अपडेट समोर आली आहे. गेल्या अनेक महिन्यांपासून दुखापतींशी लढा देणाऱ्या रियान परागच्या उजव्या खांद्यावर मुंबईतील एका रुग्णालयात यशस्वी शस्त्रक्रिया करण्यात आली आहे. या ऑपरेशननंतर आता त्याला प्रदीर्घ काळ क्रिकेटच्या मैदानापासून दूर राहावे लागणार असून, तो ‘रिहॅबिलिटेशन’ आणि रिकव्हरीच्या प्रक्रियेतून जाणार आहे. रियानने स्वतः सोशल मीडियावर पोस्ट शेअर करत चाहत्यांना ही माहिती दिली आहे.

अनफिट असतानाही संघासाठी मैदानावर धावला!

रियान परागसाठी गेल्या काही महिन्यांचा काळ अत्यंत वेदनादायी आणि आव्हानात्मक होता. आयपीएल २०२६ च्या उत्तरार्धात त्याला ‘हॅमस्ट्रिंग’चा गंभीर त्रास होत होता, ज्यामुळे तो लखनौविरुद्धचा सामना खेळू शकला नव्हता. मात्र, राजस्थान रॉयल्सला प्लेऑफमध्ये पोहोचवण्यासाठी त्याने पूर्णपणे फिट नसतानाही मुंबई इंडियन्सविरुद्धचा ‘करो या मरो’चा सामना खेळला. सनरायझर्स हैदराबादविरुद्ध एलिमिनेटर आणि गुजरात टायटन्सविरुद्धच्या क्वालिफायर-२ सामन्यातही तो मैदानावर धावताना प्रचंड वेदनेने विव्हळत असल्याचे स्पष्ट दिसत होते.

Good news on Riyan Parag – His shoulder surgery has been successful & his manager has shared an important message.

Riyan has been a absolute fighter, deserves lots of love. 🤞 pic.twitter.com/RZqOtJLDvc

— Johns. (@CricCrazyJohns) June 11, 2026

हॅमस्ट्रिंगसोबतच तो जुन्या खांद्याच्या दुखापतीनेही त्रस्त होता, ज्यासाठी अखेर त्याला शस्त्रक्रिया करावी लागली. हॉस्पिटलच्या बेडवरून हसतमुख फोटो शेअर करत रियानने लिहिले, “शेवटी खांद्याचा विजय झाला! शस्त्रक्रिया यशस्वी झाली आहे. गेल्या २ वर्षांनी माझी अशी परीक्षा घेतली, ज्याची मी कधीच कल्पना केली नव्हती. असेही काही दिवस होते जेव्हा केवळ एक सामना पूर्ण करणे माझ्यासाठी मोठे आव्हान होते. पण आता माझ्यासमोर रिकव्हरी आणि संयमाचे नवे आव्हान आहे. मी लवकरच क्रिकेटच्या मैदानावर परतणार.”

हेही वाचा – BAN vs AUS : जागतिक क्रिकेटमध्ये सर्वात मोठा उलटफेर! बांगलादेशने इतिहास रचत वर्ल्ड चॅम्पियन ऑस्ट्रेलियाला लोळवलं

‘इंडिया-ए’च्या उपकर्णधारपदाला मुकावे लागले –

रियान परागच्या खांद्याची ही दुखापत जुनी असून, तो बीसीसीआयच्या वैद्यकीय पथकाच्या देखरेखीखाली खेळत होता. श्रीलंकेत सुरू असलेल्या ५० षटकांच्या त्रिकोणीय मालिकेसाठी त्याला ‘इंडिया-ए’ संघाचा उपकर्णधार बनवण्यात आले होते. मात्र, दुखापत बळावल्यामुळे त्याला श्रीलंका दौऱ्यातून बाहेर व्हावे लागले आणि त्याच्या जागी ऋतुराज गायकवाडला संधी मिळाली.