Riyan Parag reaction on Vaibhav Sooryavanshi and Team : आयपीएल २०२६ च्या दुसऱ्या क्वालिफायर सामन्यात गुजरात टायटन्सने राजस्थान रॉयल्सचा एकतर्फी पराभव करत फायनलमध्ये धडक मारली आहे. न्यू चंडीगडमधील मुल्लानपूर मैदानावर झालेल्या या सामन्यात राजस्थानने प्रथम फलंदाजी करताना वैभव सूर्यवंशीच्या ९६ धावांच्या स्फोटक खेळीच्या जोरावर २० षटकांत २१४ धावांचा डोंगर उभारला होता. मात्र, गुजरातच्या शुबमन गिल आणि साई सुदर्शन यांनी पहिल्या विकेटसाठी १६७ धावांची विक्रमी भागीदारी रचून राजस्थानचे फायनलचे स्वप्न धुळीस मिळवले. या अत्यंत हृदयद्रावक पराभवानंतर राजस्थान रॉयल्सचा कर्णधार रियान पराग चांगलाच भावूक झाला. त्याने सामन्यानंतर खेळपट्टीचे विश्लेषण करत वंडर बॉय वैभव सूर्यवंशीवर मोठे वक्तव्य केले.

“तिथेच सामना आमच्या हातातून निसटला!”

पराभवाचे मुख्य कारण सांगताना कर्णधार रियान पराग म्हणाला, “२१५ धावा हा धावसंख्येचा बचाव करता येण्याजोगा स्कोअर होता. परंतु, दुसऱ्या डावापूर्वी खेळपट्टीवर ‘हेवी रोलरचा’ वापर केल्यामुळे ती फलंदाजीसाठी अधिकच सोपी झाली. पहिल्या डावात आमच्या फिरकीपटूंना थोडी पकड मिळत होती आणि शॉर्ट बॉलही थोडा थांबून येत होता. जर आम्ही २३० ते २४० धावा केल्या असत्या, तर गुजरातला हे आव्हान कठीण गेले असते. आम्हाला त्यांच्या सलामीवीरांना लवकर बाद करायचे होते, पण दुर्दैवाने आम्हाला त्यात अपयश आले आणि तिथेच सामना आमच्या हातातून निसटला.”

अनुभवाची कमतरता आणि सातत्याचा अभाव –

RIYAN PARAG ON VAIBHAV SOORYAVANSHI.

– Everyone loves the Baby Boss. 🥹❤️pic.twitter.com/EGPAjOcrDq

— Mufaddal Vohra (@mufaddal_vohra) May 29, 2026

संघातील युवा खेळाडूंवर बोलताना परागने अनुभवाच्या कमतरतेचाही उल्लेख केला. तो म्हणाला, “या हंगामात संघात अनेक सकारात्मक गोष्टी घडल्या, पण प्रामाणिकपणे सांगायचे तर आम्ही प्लेऑफ किंवा फायनलसाठी पात्र ठरावं, इतकी सातत्यपूर्ण कामगिरी यंदा करू शकलो नाही. संघात अनेक युवा खेळाडू होते आणि आम्ही काही नवे कॉम्बिनेशन्सही आजमावले. असे असले तरी, माझ्या खेळाडूंनी मैदानावर दाखवलेले धैर्य आणि जिद्द राजस्थान रॉयल्सच्या भविष्यासाठी अत्यंत आशादायक आहे.”

हेही वाचा – Vaibhav Sooryavanshi Crying : राजस्थान पराभूत होताच वैभव सूर्यवंशीला अश्रू अनावर! डगआऊटमध्ये एकटाच बसून रडला ‘वंडर बॉय’; पाहा VIDEO

वैभव सूर्यवंशीबाबत रियान पराग भारावला!

या संपूर्ण हंगामात आणि क्वालिफायर सामन्यात ९६ धावांची झुंजार खेळी करणाऱ्या वैभव सूर्यवंशीबद्दल बोलताना रियान पराग अक्षरशः निशब्द झाला. पराग म्हणाला, “वैभवची कामगिरी थक्क करणारी आहे. काही खेळाडू फक्त मैदानावर येतात, मोठे फटके मारतात आणि धावा करतात; पण वैभव तसा नाही. आज त्याने परिस्थितीनुसार खेळत आपले दुसरे रूप दाखवले. तो प्रत्येक गोष्टीचा चोख हिशोब ठेवतो आणि खेळपट्टीचा अभ्यास करतो. वयाच्या अवघ्या १५ व्या वर्षी तो हे सगळं नेमकं कसं करतो, हे मला अजूनही समजलेलं नाही. मला पूर्ण आशा आहे की, तो भविष्यात भारतासाठीही अशीच कामगिरी करेल आणि राजस्थानला दुसरे आयपीएल जेतेपद मिळवून देण्यात मुख्य भूमिका बजावेल.”