Revati Sule Wedding : राष्ट्रवादी काँग्रेसचे ज्येष्ठ नेते शरद पवार यांची नात आणि खासदार सुप्रिया सुळे यांची कन्या रेवती सुळे लवकरच विवाहबंधनात अडकणार आहेत. रेवती सुळे आणि नागपूर येथील उद्योजक सारंग अरुण लखानी यांचा शुभविवाह २० जून रोजी मुंबईत पार पडणार असल्याची माहिती समोर आली आहे. मिळालेल्या माहितीनुसार, हा विवाहसोहळा मुंबईतील एका नामांकित ठिकाणी शाही थाटात होणार असून, पवार आणि लखानी कुटुंबाकडून जोरदार तयारी सुरू आहे. या सोहळ्याला राज्य आणि देशातील अनेक दिग्गज राजकीय नेते, उद्योगपती आणि विविध क्षेत्रातील मान्यवर उपस्थित राहण्याची शक्यता आहे. भव्य रिसेप्शनचे आयोजन लग्नानंतर मुंबईत भव्य स्वागत समारंभ होणार असून, वरपक्ष नागपूर येथील असल्याने नागपूरमध्येही खास रिसेप्शन आयोजित केले जाणार आहे. याशिवाय, राजधानी दिल्ली येथेही मोठा स्वागत सोहळा पार पडण्याची शक्यता आहे. कोण आहेत सारंग लखानी? सारंग अरुण लखानी हे विश्वराज ग्रुपचे अध्यक्ष व व्यवस्थापकीय संचालक अरुण लखानी यांचे सुपुत्र आहेत. ते एक उत्कृष्ट बॅडमिंटनपटू असून त्यांनी राष्ट्रीय आणि आंतरराष्ट्रीय स्पर्धांमध्ये सहभाग घेतला आहे. कोण आहेत रेवती सुळे? रेवती सुळे या सुप्रिया सुळे आणि सदानंद सुळे यांची कन्या आहेत. त्यांनी London School of Economics मधून शिक्षण पूर्ण केले आहे. बारामती लोकसभा निवडणुकीत त्यांनी प्रथमच सक्रिय राजकीय सहभाग घेत आईसाठी प्रचारही केला होता. या विवाहसोहळ्याकडे राजकीय आणि सामाजिक वर्तुळाचे लक्ष लागले असून, हा सोहळा वर्षातील चर्चेचा विषय ठरण्याची शक्यता आहे.