नव्या १०० स्वच्छतागृहांसाठी ४० कोटींचा घाट
महिलांच्या नावाखाली नवा प्रकल्प; जागा कुठून आणणार?
Restroom: शहरातील सार्वजनिक स्वच्छतागृहांची दूरवस्था दूर करण्यासाठी महापालिकेच्या १५ क्षेत्रीय कार्यालयांनी गेल्या सहा महिन्यांत १५ कोटी रुपये खर्च केले आहेत.

घनकचरा व्यवस्थापन विभागानेही अतिरिक्त निधीची मागणी केली आहे. मात्र, दुरुस्ती आणि देखभालीसाठीचा निधी संपल्यानंतर स्वच्छतागृहांची अवस्था पुन्हा बिकट झाली आहे. असे असतानाच प्रशासनाने महिलांसाठी १०० आधुनिक स्वच्छतागृहे उभारण्यासाठी तब्बल ४० कोटी ६० लाख रुपयांची निविदा काढली आहे. जुन्या स्वच्छतागृहांची दूरवस्था कायम असताना महिलांचे नाव पुढे करून नव्या स्वच्छतागृहांचा घाट नेमका कोणासाठी, असा प्रश्न उपस्थित होत आहे.

गेल्या तीन ते चार वर्षांत नवीन स्वच्छतागृहे उभारण्यासाठी जागाच उपलब्ध होत नसल्याने महापालिका प्रशासनाने नवीन स्वच्छतागृहे बांधणे बंद केले होते. आता अचानक १०० स्वच्छतागृहांसाठी निविदा काढण्यात आली आहे. त्यामुळे यासाठी जागा कुठून उपलब्ध करणार, असा प्रश्न निर्माण झाला आहे. त्यासाठी नव्याने जागा शोधली जाणार, की जुन्या स्वच्छतागृहांवर बुलडोझर फिरवून त्याच ठिकाणी नवीन बांधणार, याबाबतही स्पष्टता नाही.

महापालिकेच्या घनकचरा व्यवस्थापन विभागामार्फत ही स्वच्छतागृहे उभारण्यात येणार असून, त्यांचा वापर महिलांना मोफत करता येणार आहे. निविदेची अंदाजित रक्कम ४० कोटी ६० लाख ६१ हजार २५४ रुपये आहे. उभारणीनंतर दोन वर्षे दैनंदिन स्वच्छता, देखभाल आणि दुरुस्तीची जबाबदारी ठेकेदारावर राहणार आहे.

एकीकडे जुन्या स्वच्छतागृहांच्या दुरुस्तीवर सहा महिन्यांत १५ कोटी रुपये खर्च करूनही दूरवस्था संपलेली नसताना दुसरीकडे नव्या स्वच्छतागृहांसाठी ४० कोटींचा खर्च प्रस्तावित आहे. त्यामुळे जुन्या सुविधांची देखभाल करण्याऐवजी नव्या प्रकल्पावर एवढा मोठा खर्च करण्याची गरज काय आणि त्यासाठी जागा कशी उपलब्ध होणार, असे प्रश्न उपस्थित होत आहेत.