पुणे – मागील वर्षीच्या कडक लॉकडाऊनच्या काळानंतर आता अर्थव्यवस्था धीम्या गतीने पूर्वपदावर येत आहे आणि जागतिक रेटिंग संस्था भारताच्या 2021 आणि 2022 मधील विकासाची गती वाढत आहे. अशा वेळी निवासी जागांसाठीची मागणी केंद्र सरकार, विविध राज्यांमधील सरकार, रिझर्व्ह बॅंक आणि पूर्ण बॅंकिंग क्षेत्र यांनी योजलेल्या विविध उपायांमुळे पुन्हा वाढीला लागली आहे. विविध क्षेत्रांत पुन्हा रोजगार उपलब्ध होऊ लागल्यामुळे घरांची मागणीही स्थिर झाली आणि गेल्या अनेक वर्षात नव्हत्या एवढ्या परवडणाऱ्या किमतींना घरे उपलब्ध झाल्याचा फायदा घ्यायला ग्राहक तयार होत आहेत.

घर खरेदी करू इच्छिणाऱ्या ग्राहकांचा आत्मविश्वास वाढावा यासाठी केंद्र सरकार आणि विविध राज्यांतील सरकार यांनी केलेल्या विविध उपायांचा चांगला परिणाम जानेवारी ते मार्चच्या पहिल्या तिमाहीत दिसून आला. या तिमाहीत भारतातील आठ प्रमुख शहरांत घरांची विक्री ऑक्‍टोबर-डिसेंबर 2020 या तिमाहीच्या तुलनेत 12 टक्‍क्‍यांनी वाढली, असे “प्रॉप टायगर’च्या ताज्या “रिअल इन्साइट’ या अहवालात नमूद करण्यात आले आहे.

जानेवारी 1 ते मार्च 31, 2021 या काळात 66,176 घरांची विक्री झाली. या काळात महाराष्ट्र, दिल्ली आणि इतर राज्यांत घर खरेदी करण्याकरिता ग्राहकांना प्रोत्साहन देण्यासाठी मुद्रांक शुल्क आणि सर्कल रेट मध्ये सवलत असे उपाय योजण्यात आले होते. पुरवठ्याची बाजू पाहता एकूण 53037 घरे देशभरात या तीन महिन्यात नव्याने निर्माण झाली. ही वाढ गतवर्षीच्या तुलनेत 49 टक्के होती. याच तिमाहीत केंद्रीय मंत्रिमंडळाने भारतात पायाभूत सोयींचा विकास करण्यासाठी 20,000 कोटी रुपयांचे भांडवल देऊन विकास वित्त संस्था स्थापन करण्यासाठीचे विधेयक संमत केले.

महाराष्ट्र सरकारचा मुद्रांक शुल्क काही काळ कमी करण्याचा निर्णय मुंबई आणि पुण्यात घरांच्या विक्रीत झालेली मोठी घट रोखण्यात साह्यभूत झाला. देशांत विक्रीअभावी पडून राहिलेल्या घरांपैकी मोठ्या प्रमाणावर या दोन शहरांमधील आहेत. मुद्रांक शुल्कातील सवलत राज्य सरकारने चालू ठेवायला हवी होती कारण त्यामुळे किमती कमी होऊन घर विक्रीला उठाव आला असता.

जवळजवळ सर्वच बॅंकांनी ग्राहकांचा हुरूप वाढवण्यासाठी प्रयत्न म्हणून गृहकर्जंवरील व्याजाचे दर 6.9 टक्के एवढे कमी पातळीवर आणले आहेत. हे व्याजदर असेच कमी राहतील आणि भारतीय अर्थव्यवस्थेला पुन्हा उभारी येण्याच्या प्रक्रियेत सहाय्यभूत ठरतील, अशी आशा या व्यवसायातील धुरिणांना वाटत आहे.