Virat Kohli 38th Birthday RCB Special Video With Mr Nags : क्रिकेट जगतातील आधुनिक महान फलंदाज आणि टीम इंडियाचा स्टार विराट कोहली याच्या ३८ व्या वाढदिवशी जगभरातून त्याच्यावर शुभेच्छांचा वर्षाव होत आहे. आयपीएलमधील त्याची फ्रँचायझी असलेल्या रॉयल चॅलेंजर्स बंगळुरूने (RCB) आपल्या अधिकृत सोशल मीडिया हँडलवर एक अत्यंत मजेशीर आणि हटके व्हिडीओ शेअर करत आपल्या ‘रन मशिन’ला अनोख्या अंदाजात शुभेच्छा दिल्या आहेत.

आरसीबीचे मजेशीर कॅप्शन; मिस्टर नॅग्ससोबतची केमिस्ट्री व्हायरल

आरसीबीने आपल्या अधिकृत एक्स (ट्विटर) अकाउंटवरून हा व्हिडीओ शेअर करताना लिहिले, “आज त्याच्या जिवलग मित्राचा वाढदिवस आहे. त्यामुळे मिस्टर नॅग्स आणि विराट कोहली यांचा एडिटेड व्हिडीओ पोस्ट करणे तर बनतेच.” या पोस्टनंतर चाहत्यांनी व्हिडिओला प्रचंड पसंती दर्शवली असून काही क्षणांतच तो सोशल मीडियावर तुफान व्हायरल झाला आहे.

विराटवरील प्रेमाच्या फ्रेममध्ये अनुष्काचीही झलक –

It’s “𝐡𝐢𝐬” bestie’s birthday. Ofc we HAD to post a Mr. Nags x VK edit. 😂❤️

#PlayBold #ನಮ್ಮRCB #HappyBirthdayKingKohli | Virat Kohli https://t.co/yCbAnCBOdx

— Royal Challengers Bengaluru (@RCBTweets) November 5, 2026

या व्हिडिओमध्ये आरसीबीचा लोकप्रिय एंटरटेनर मिस्टर नॅग्स (डॅनिश सैत) आपल्या नेहमीच्या अनोख्या अवतारात दिसतो. लाल हेडबँड, काळा चष्मा आणि झुबकेदार मिशा अशा खास लूकमध्ये मिस्टर नॅग्सने विराटसोबतच्या जुन्या आठवणींना उजाळा दिला आहे. विराटवरील प्रेम आणि मैत्री व्यक्त करणाऱ्या या खास व्हिडीओ फ्रेममध्ये त्याची पत्नी अनुष्का शर्मा हिचीही सुंदर झलक पाहायला मिळते.

डान्सचे ठुमके अन् ‘मी तुझ्यापेक्षा हँडसम’; नॅग्सने घेतली फिरकी

व्हिडिओच्या सुरुवातीला विराट कोहली आणि मिस्टर नॅग्स एकत्र उत्साहात डान्स करताना आणि थिरकताना दिसत आहेत. दोघांमधील इनसाइडर शोमधील जुनी केमिस्ट्री यात पुन्हा पाहायला मिळते. शुभेच्छा दिल्यानंतर शेवटी मिस्टर नॅग्सने, “लक्षात ठेव, मी अजूनही तुझ्यापेक्षा जास्त हँडसम आहे,” असा मजेशीर टोमणा मारत विराटची नेहमीच्या खोडकर शैलीत फिरकी घेतली.

हेही वाचा – India Beat Pakistan : सॅफ चॅम्पियनशिपमध्ये भारताचा पाकिस्तानवर थरारक विजय; सुहेल भटचे दोन गोल, अतिरिक्त वेळेत पाकिस्तानचा कडवा प्रतिकार

न्यूझीलंडमध्येच रंगला वाढदिवसाचा माहोल; चाहत्यांना दिली ७४ धावांची भेट

विराट कोहली सध्या भारतीय संघासोबत न्यूझीलंड दौऱ्यावरील एकदिवसीय मालिकेत व्यग्र आहे. वाढदिवसाच्या पूर्वसंध्येलाच त्याने ऑकलंड येथे न्यूझीलंडविरुद्ध अवघ्या ५१ चेंडूंत ७४ धावांची वादळी खेळी करत चाहत्यांना विजयाची भेट दिली होती. त्या सामन्यादरम्यानही स्टेडियममधील प्रेक्षकांनी विराटच्या वाढदिवसाच्या शुभेच्छांचे फलक झळकावून जोरदार जल्लोष केला होता.