RBI Repo Rate : महागाईचा वाढता दबाव आणि कच्च्या तेलाच्या महागलेल्या किमतींच्या पार्श्वभूमीवर भारतीय रिझर्व्ह बँक (RBI) आगामी काळात रेपो दर वाढवू शकते. अर्थतज्ज्ञांच्या अंदाजानुसार ऑक्टोबर आणि डिसेंबरमध्ये प्रत्येकी 25 आधार अंकांची वाढ होण्याची शक्यता आहे. तसे झाल्यास रेपो दर 5.75 टक्क्यांवर पोहोचू शकतो. याचा परिणाम कर्जाच्या व्याजदरावर आणि पर्यायाने ईएमआयवर होऊ शकतो.

महागाई हा RBI समोरील प्रमुख मुद्दा आहे. जुलैमध्ये 4.45 टक्के असलेली किरकोळ महागाई ऑगस्टमध्ये वाढून 4.82 टक्के झाली. अन्नधान्याच्या किमती वाढल्याने अन्नमहागाई 5.66 टक्क्यांवर पोहोचली. सप्टेंबरमध्ये किरकोळ महागाई सुमारे 5.5 टक्क्यांपर्यंत जाण्याचा अंदाज आहे.

पश्चिम आशियातील तणावामुळे कच्च्या तेलाच्या किमती 100 डॉलर प्रति बॅरलच्या पुढे गेल्या आहेत. तेल महागल्यास वाहतूक, उत्पादन आणि इंधनाचा खर्च वाढून महागाईवर आणखी दबाव येऊ शकतो.

HSBC आणि नोमुरा या संस्थांनी ऑक्टोबर आणि डिसेंबरमध्ये 25-25 आधार अंकांची वाढ होण्याचा अंदाज व्यक्त केला आहे. SBI रिसर्चनेही महागाई 6.5 टक्क्यांपेक्षा जास्त जाण्याची शक्यता व्यक्त केली आहे.

मात्र, MUFGचा अंदाज वेगळा असून त्यांना दरवाढीची सुरुवात डिसेंबर 2026 पासून होण्याची शक्यता वाटते. त्यांच्या मते 2027 च्या सुरुवातीपर्यंत रेपो दर 5.75 टक्क्यांवर जाऊ शकतो.

दरम्यान, बँकिंग व्यवस्थेतील अतिरिक्त रोख रक्कमही RBIसाठी आव्हान ठरत आहे. कर्जाची मागणी वाढत असताना ही अतिरिक्त रोख रक्कम महागाईवर परिणाम करू शकते. त्यामुळे पुढील काही महिन्यांत RBIच्या निर्णयाकडे कर्जदार आणि गुंतवणूकदारांचे लक्ष राहणार आहे.