मुंबई – देशातील सर्वात मोठ्या उद्योगपतींपैकी एक असलेले रतन टाटा यांना वयाच्या 84 व्या वर्षी मुंबईच्या HSNC विद्यापीठाने डॉक्टरेट देऊन सन्मानित केले आहे. यावेळी महाराष्ट्राचे राज्यपाल भगतसिंग कोश्यारी आणि एचएसएनसी विद्यापीठाचे प्रोव्होस्ट डॉ. निरंजन हिरानंदानी हेही उपस्थित होते.

या विद्यापीठाचा हा पहिलाच दीक्षांत समारंभ होता. रतन टाटा यांच्या कार्याचा गौरव करताना त्यांना ही पदवी प्रदान करण्यात आली. रतन टाटा यांना एखाद्या संस्थेने किंवा विद्यापीठाने पदवी देऊन सन्मानित करण्याची ही पहिलीच वेळ नाही. यापूर्वी, नुकतेच यूकेच्या मँचेस्टर विद्यापीठानेही रतन टाटा यांना डॉक्टरेट पदवी देऊन सन्मानित केले होते.

सध्या देशात अनेक उद्योगपतींची नावे चर्चेत राहतात, मात्र रतन टाटा यांचे नाव येताच सर्वजण त्यांच्याकडे अत्यंत आदराच्या नजरेने पाहतात. रतन टाटा यांनी आपल्या मेहनतीच्या जोरावर टाटा समूहाला नव्या उंचीवर नेले आहे. रतन टाटा यांनी 1991 ते 2012 पर्यंत टाटा समूहाचे अध्यक्ष म्हणून काम केले. डिसेंबर 2012 मध्ये त्यांनी टाटा समूहाचे अध्यक्षपद सोडले. मात्र तरीही ते टाटा ग्रुप चॅरिटेबल ट्रस्टचे अध्यक्ष आहेत. टाटा सन्समध्ये 100 हून अधिक कंपन्या काम करतात, त्यामध्ये सुईपासून ते विमानापर्यंत सर्व कामे केली जातात.

रतन टाटा यांना मिळालेल्या पदव्या –
रतन टाटा यांना यापूर्वीही अनेक पदव्या मिळाल्या आहेत. रतन टाटा यांना कॅनडाच्या प्रतिष्ठित यॉर्क युनिव्हर्सिटीकडून कायद्याची मानद डॉक्टर पदवी प्राप्त झाली आहे. त्यांना 2015 मध्ये क्लेमसन विद्यापीठाने ऑटोमोटिव्ह अभियांत्रिकीमध्ये डॉक्टरेट आणि 2018 मध्ये स्वानसी विद्यापीठाकडून अभियांत्रिकीमध्ये मानद डॉक्टरेट प्रदान करण्यात आली होती. याशिवाय अलीकडेच यूकेच्या मँचेस्टर विद्यापीठानेही रतन टाटा यांना डॉक्टरेट पदवी देऊन सन्मानित केले होते.