Ayodhya Ram Mandir : अयोध्येतील राम मंदिराचे दरवाजे नवीन रामलल्ला मूर्तीच्या प्रतिष्ठापनेनंतर मंगळवारपासून (दि. 23) सर्वसामान्यांसाठी खुले करण्यात आले. मोठ्या संख्येने भाविक, स्थानिक आणि इतर राज्यांतील अभ्यागत, अयोध्येतील मंदिरात प्रवेश मिळवण्यासाठी मंदिर मार्गावर मोठ्या प्रमाणात रांगा लावत आहेत. मुख्य कार्यक्रम संपल्यानंतरच आम्हाला दर्शनाची संधी द्यावी अशी मागणी भाविकांनी केली होती. त्यामुळे सध्या मंदिर परिसरात मोठी गर्दी झाल्याचं चित्र दिसून येत आहे.

रामललाच्या प्राणप्रतिष्ठेनंतर पहिल्याच दिवशी अयोध्येत भाविकांचा महापूर लोटला आहे. प्रभू रामाच्या दर्शनासाठी हजारो भाविक अयोध्येत दाखल होत आहेत. गर्दी हाताळताना मंदिर व्यवस्थापनाला मोठ्या अडचणी समोर आल्या होत्या. पंतप्रधान मोदी यांच्याहस्ते रामलल्ला अभिषेक करण्यात आल्यानंतर पहिल्याच दिवशी तीन लाख भाविकांनी दर्शन घेतल्याचे उत्तर प्रदेश सरकारने म्हटले आहे.

नागरिकांची गैरसोय होऊ नये म्हणून सर्व व्यवस्था करण्यात आल्या आहेत. सध्या मंदिर परिसरात आठ हजारांहून अधिक सुरक्षा कर्मचारी तैनात करण्यात आले आहेत. याचे अनेक व्हिडिओ देखील सोशल मीडियावर व्हायरल होत आहेत. पहाटे दोन वाजल्यापासूनच राम मंदिराच्या मुख्य दरवाजाबाहेर भाविकांची मोठी रांग लागली होती. यावेळी लोक ‘जय श्रीराम… जय श्रीराम…’चा जयघोष करत होते.