Rakul Preet : बॉलिवूड अभिनेत्री रकुल प्रीत सिंह हिचा जन्म १० ऑक्टोबर १९९० रोजी नवी दिल्लीमध्ये झाला. आज ती आपला ३५ वा वाढदिवस साजरा करत आहे. रकुलला लहानपणापासूनच चित्रपटसृष्टीत करिअर करायचं स्वप्न होतं. फक्त १८ व्या वर्षी तिने मॉडेलिंग क्षेत्रातून आपल्या प्रवासाची सुरुवात केली. अभिनयाबरोबरच ती राष्ट्रीय स्तरावरील गोल्फपटू देखील राहिली आहे, त्यामुळे ती खेळ आणि अभिनय दोन्हीमध्ये समान पारंगत आहे.

रकुलने २००९ मध्ये कन्नड चित्रपट ‘गिल्ली’ मधून फिल्म इंडस्ट्रीत पदार्पण केले. त्यानंतर तिने काही काळ शिक्षण पूर्ण करण्यासाठी विश्रांती घेतली. २०११ मध्ये शिक्षण पूर्ण झाल्यानंतर तिने तेलुगू आणि तमिळ चित्रपटांमध्ये काम करायला सुरुवात केली. २०१२ मध्ये ‘ठदैयारा थाक्का’ या तमिळ चित्रपटात ती सहाय्यक भूमिकेत दिसली.

२०१३ मध्ये ‘पुथगम’ आणि ‘वेंकटद्री एक्सप्रेस’ या चित्रपटांमुळे तिला लोकप्रियता मिळाली आणि तिच्या अभिनयासाठी तिला ६१ वा फिल्मफेअर पुरस्कार मिळाला. रकुलच्या म्हणण्यानुसार, तिचं खऱ्या अर्थानं स्वप्न हिंदी चित्रपटसृष्टीत काम करण्याचं होतं; साऊथ चित्रपटसृष्टीत काम मिळणं हे तिच्यासाठी एक सुंदर योगायोग ठरला.

रकुलने २०१४ मध्ये ‘यारियां’ या चित्रपटातून बॉलिवूडमध्ये प्रवेश केला. त्यानंतर ती ‘दे दे प्यार दे’, ‘अटॅक’, ‘थॅंक गॉड’, ‘कटपुतली’ आणि ‘अय्यारी’ अशा अनेक चित्रपटांमध्ये झळकली. आज ती साऊथ आणि बॉलिवूड दोन्ही इंडस्ट्रीमध्ये आपली स्वतंत्र ओळख निर्माण करण्यात यशस्वी ठरली आहे.