मुंबई : बृहन्मुंबई महानगरपालिका (बीएमसी) निवडणुकीच्या रणांगणात महाराष्ट्र नवनिर्माण सेना (मनसे) (Raj Thackeray) आणि शिवसेना (उद्धव बाळासाहेब ठाकरे गट) यांची युती असतानाच, मनसे अध्यक्ष राज ठाकरे यांनी पक्षाच्या उमेदवारांना आणि कार्यकर्त्यांना आक्रमक मार्गदर्शन केले आहे. आज (१ जानेवारी २०२६) राज ठाकरेंच्या ‘शिवतीर्थ’ निवासस्थानी मनसेच्या मुंबईतील ५३ उमेदवारांनी त्यांची भेट घेतली. या बैठकीत राज ठाकरेंनी उमेदवारांसोबत सविस्तर संवाद साधला आणि निवडणुकीसाठी खास ‘कानमंत्र’ दिला. शिवसेना (उद्धव गट) सोबतच्या युतीत मनसे मुंबईत ५३ जागांवर निवडणूक लढवत आहे. ही युती पहिल्यांदाच एकत्र निवडणूक रिंगणात उतरली आहे. राज ठाकरेंनी उमेदवारांना एकजूट ठेवण्याची सूचना देताना पैशांच्या प्रलोभनांना बळी न पडण्याचा स्पष्ट इशारा दिला. ते म्हणाले, “तुम्हाला पैशांचे आमिष दाखवले जाईल. मलाही अनेकदा अशा ऑफर्स आल्या होत्या, पण मी त्या ठामपणे नाकारल्या. तुम्हीही त्याला बळी पडू नका. पैसे घेऊन मत विकू नका. मुंबई वाचवायची आहे, ही शेवटची संधी आहे.” मुंबई मराठी माणसाची असल्याचे सांगत राज ठाकरेंनी निवडणूक व्यवस्थापनावर विशेष भर दिला. ते पुढे म्हणाले, “प्रत्येक मतदान केंद्रावर (बूथवर) किमान १० कार्यकर्ते तैनात करा. बोगस मतदान होऊ देऊ नका. सतर्क राहा.” बोगस मतदानाबाबत ते अत्यंत आक्रमक झाले आणि म्हणाले, “जर बोगस मतदार आढळला, तर त्याला तिथेच फटकारून काढा.” या कडक शब्दांमुळे राजकीय वर्तुळात मोठी चर्चा सुरू झाली आहे. राज ठाकरेंच्या या मार्गदर्शनामुळे मनसेकडून निवडणुकीत शिस्तबद्ध आणि आक्रमक रणनीती आखली जात असल्याचे दिसते. मुंबई महापालिका निवडणूक १५ जानेवारी २०२६ रोजी होत असून, मराठी मुद्दा आणि मुंबईच्या संरक्षणावर पुन्हा एकदा राजकारण तापण्याची चिन्हे दिसत आहेत. या बैठकीनंतर मनसे उमेदवार प्रचाराला जोरदार सुरुवात करणार आहेत.
