Rahul Gandhi : पंतप्रधान नरेंद्र मोदी यांनी दिमागी नक्षली मुद्द्याचा पुनरूच्चार करत राजकीय विरोधकांना घेरण्याचे सत्र कायम ठेवले. त्यानंतर कॉंग्रेसचे नेते राहुल गांधी (Rahul Gandhi) यांनी मोदींना पुन्हा जाहीर चर्चेचे आव्हान दिले.

सुरक्षा जवानांसमवेत दिवाळी साजरी करण्याची परंपरा मोदींनी यंदाही कायम ठेवली. त्यांनी रविवारी छत्तीसगढच्या बस्तरमधील केंद्रीय राखीव पोलीस दलाच्या (सीआरपीएफ) छावणीला भेट दिली. तसेच, जवानांना उद्देशून भाषण केले. जंगलांमधून सशस्त्र नक्षलवादी नाहीसे झाले आहेत.

मात्र, दिमागी नक्षलींनी अनेक राजकीय पक्षांत आणि वेगवेगळ्या संघटनांमध्ये शिरकाव केला आहे. दिमागी नक्षली जनतेला राज्यघटना आणि लोकशाही विरोधात चिथावत आहेत, अशी शाब्दिक तोफ मोदींनी डागली.

त्या पार्श्‍वभूमीवर, राहुल यांनी मोदींना प्रत्युत्तर देण्यासाठी सोशल मीडियावरून सीआरपीएफ जवानांना उद्देशून पोस्ट जारी केली. प्रिय जवानांनो, तुमचे चेहरे सर्व काही सांगून गेले. मोदींच्या खोट्या बोलण्यावर तुमचा विश्‍वास नसल्याचे स्पष्ट झाले. त्यांनी आम्हाला नक्षली म्हटले. त्यांना मी दिलेले आव्हान कायम आहे. देशद्रोही कोण आहे, परकीय शक्तींच्या इशाऱ्यांनुसार कोण चालतेय या मुद्द्यांवर त्यांनी माझ्याशी जाहीर चर्चा करावी.

कुठेही आणि केव्हाही तशा चर्चेस मी तयार आहे. तशा चर्चेनंतर मोदी पुन्हा एकाही जवानासमोर उभे राहण्याची हिंमत करणार नाहीत अशी गॅरंटी मी देतो, असे थेट भाष्य राहुल (Rahul Gandhi) यांनी केले.

देशद्रोही, परकीय मदत, मतदारयाद्या पडताळणी (एसआयआर) आदी मुद्द्यांवरून सत्ताधारी आणि विरोधकांमध्ये तीव्र स्वरूपाची शाब्दिक आतषबाजी सुरू आहे. त्या शाब्दिक युद्धात आघाडीवर राहत राहुल (Rahul Gandhi) यांनी याआधी मोदींना जाहीर चर्चेचे आव्हान दिले. त्यांनी तशा चर्चेचा आग्रह मोदींना घेरण्यासाठी लावून धरला आहे.