नवी दिल्ली – पंतप्रधान मोदींचा अपमान करण्याचा प्रयत्न करत राहुल गांधींनी संपूर्ण ओबीसी समाजाचा अपमान केला आहे. गांधी परिवाराने दलित किंवा मागासवर्गीय लोकांचा अपमान करण्याची ही पहिलीच वेळ नाही. आदिवासी समाजातील एक महिला राष्ट्रपती झाल्यावर गांधी कुटुंबाच्या सूचनेवरून कॉंग्रेस सदस्यांनी राष्ट्रपती द्रौपदी मुर्मू यांचाही अपमान केला आहे, अशा शब्दांत केंद्रीय मंत्री स्मृती इराणी यांनी राहुल गांधींवर निशाणा साधला.

इराणी एका पत्रकार परिषदेत म्हणाल्या की, राहुल गांधी संसदेत पंतप्रधानांसाठी अपमानास्पद शब्द वापरतात आणि त्यांच्यावर आरोप करतात. परंतु ते स्वतःच्या विधानाची सत्यता सिद्ध करू शकत नाहीत. कोर्टाने राहुल गांधींना एका व्यक्तीचा अपमान केल्याबद्दल नाही तर संपूर्ण समाजाचा अपमान केल्याबद्दल दोषी ठरवले.

एका मासिकाला दिलेल्या मुलाखतीत राहुल गांधी यांनी म्हटले होते की, पंतप्रधान मोदींची प्रतिमा नष्ट करेपर्यंत त्यांच्यावर हल्ला करतच राहू, असा आरोप केंद्रीय मंत्र्यांनी केला आहे. गांधी घराण्यानेही पंतप्रधानांची प्रतिमा डागाळण्याचा प्रयत्न केला पण त्यात त्यांना यश आले नाही. पंतप्रधान मोदींवरील सर्वसामान्यांचे प्रेम त्यांना कमी करता आले नाही.

राहुल गांधींवर जोरदार हल्ला चढवताना स्मृती इराणी म्हणाल्या की, या अपात्रतेच्या निकालाच्या निमित्ताने राहुल गांधींची मानसिक दिवाळखोरी समोर आली आहे. लंडनमध्ये, भारतात, संसदेत आणि संसदेबाहेर ते सतत खोटे बोलत आहेत. राहुल गांधींचे लक्ष्य पंतप्रधान मोदी असून पंतप्रधान मोदींचे लक्ष्य देशाचा विकास हेच आहे.

युवक कॉंग्रेसचे अध्यक्ष श्रीनिवास बीवी यांनी यापूर्वी स्मृती इराणी यांच्यावर हल्ला करून त्यांना मूकबधिर म्हटले होते. याबाबत स्मृती इराणी यांना प्रश्न विचारला असता त्या म्हणाल्या की, शब्द राहुल गांधींचे आहेत, शिष्टाचार सोनिया गांधींचे आहेत आणि फक्त शब्द युवक कॉंग्रेसचे आहेत. जेव्हा जेव्हा कोणा कॉंग्रेस नेत्याला बढती हवी असते, तेव्हा ते अशी विधाने करत असतात. राहुल गांधी यांना संसदेतून बाहेर पडल्यानंतर सरकारी बंगला रिकामा करण्याची नोटीस देण्यात आली आहे. त्यावर स्मृती इराणी म्हणाल्या की, ते घर राहुल गांधींचे नाही, ते सर्वसामान्यांचे आहे.