Rahul Gandhi : काँग्रेस नेते आणि लोकसभेतील विरोधी पक्षनेते राहुल गांधी यांनी गुरुवारी निवडणूक आयोग आणि मुख्य निवडणूक आयुक्त ज्ञानेश कुमार यांच्यावर गंभीर आरोप केले. निवडणूक प्रक्रियेत गैरप्रकार झाल्याचा दावा करत राहुल गांधी यांनी लोकसभा आणि विविध विधानसभा निवडणुकांच्या निकालांवर प्रश्न उपस्थित केले. ज्ञानेश कुमार यांनी तातडीने आपल्या पदाचा राजीनामा द्यावा, अशी मागणीही त्यांनी केली.

‘ज्ञानेश कुमार यांनी राजीनामा द्यावा’

राहुल गांधी यांनी पत्रकार परिषदेत निवडणूक आयोगाच्या कामकाजावर प्रश्न उपस्थित करत मतदारांच्या मतांची सुरक्षा हा लोकशाहीचा महत्त्वाचा भाग असल्याचे म्हटले. त्यांच्या आरोपानुसार, निवडणूक प्रक्रियेत मतांशी छेडछाड झाल्यास नागरिकांना आपल्या प्रतिनिधीची निवड करण्याचा अधिकारच कमकुवत होतो.

राहुल गांधी यांनी मुख्य निवडणूक आयुक्त ज्ञानेश कुमार यांच्या नियुक्तीवरही प्रश्न उपस्थित केले. पंतप्रधान नरेंद्र मोदी आणि केंद्रीय गृहमंत्री अमित शाह यांनी ज्ञानेश कुमार यांची नियुक्ती केल्याचा दावा त्यांनी केला. मोदी आणि शाह हे ज्ञानेश कुमार यांचा बचाव करत असल्याचा आरोपही त्यांनी केला.

#WATCH | Delhi: Reacting to Indian Express report on 2 ECs objecting to discrepancies in SIR process, LoP Lok Sabha, Rahul Gandhi says, “I want to put some points across here about what has recently been in the news… I come from a political family, and I have spent more than 50 years in a political family… In India, there is a fundamental force called anti-incumbency that very quickly starts to resist any government. It does not spare anybody. Indira Gandhi won the Bangladesh war, was at the height of her popularity, and then suddenly, within a year or two, massive anti-incumbency, massive pressure. The same exact thing happens to leader after leader after leader. Happens to Congress leaders; it happens to regional parties, but for some reason, it never happens to Mr. Narendra Modi, does not happen to Mr. Shah, does not happen to the BJP.”

— ANI (@ANI) September 24, 2026

‘अनेक निवडणुकांवर परिणाम’

राहुल गांधी यांनी देशातील निवडणुकांमध्ये मोठ्या प्रमाणात गैरप्रकार झाल्याचा आरोप केला. विशेषतः मतदार याद्यांमध्ये बदल आणि विशेष गहन पुनरीक्षण म्हणजेच एसआयआरच्या प्रक्रियेवर त्यांनी प्रश्न उपस्थित केले.

या पार्श्वभूमीवर निवडणूक आयोगातील दोन आयुक्तांनी एसआयआरसह काही निर्णयांवर आक्षेप घेतल्याच्या वृत्ताचा त्यांनी संदर्भ दिला. ‘द इंडियन एक्स्प्रेस’च्या वृत्तानुसार, निवडणूक आयुक्त सुखबीर सिंह संधू आणि विवेक जोशी यांनी मागील दहा महिन्यांत काही निर्णयांवर अनेक वेळा अधिकृत आक्षेप नोंदवले होते.

मात्र, निवडणूक आयोगाने या वृत्तावर स्पष्टीकरण देताना आयुक्तांमधील प्रश्न, सूचना आणि अंतर्गत चर्चा ही संस्थेच्या नियमित प्रक्रियेचा भाग असल्याचे म्हटले आहे. आयोगाने घेतलेले अंतिम निर्णय एकमताने झाले असल्याचेही आयोगाने स्पष्ट केले आहे.

इंदिरा गांधींचा संदर्भ

राहुल गांधी यांनी देशातील सत्ता-विरोधी लाटेचाही उल्लेख केला. भारताच्या राजकारणात कोणत्याही सरकारविरोधात कालांतराने नाराजी निर्माण होऊ शकते, असे ते म्हणाले. यासाठी त्यांनी माजी पंतप्रधान इंदिरा गांधी यांचे उदाहरण दिले.

बांगलादेश युद्धातील विजयामुळे इंदिरा गांधी लोकप्रियतेच्या शिखरावर होत्या. मात्र, त्यानंतर काही काळातच त्यांच्या सरकारविरोधात सत्ता-विरोधी वातावरण निर्माण झाले, असा संदर्भ राहुल गांधी यांनी दिला.

याच पार्श्वभूमीवर त्यांनी पंतप्रधान नरेंद्र मोदी, गृहमंत्री अमित शाह आणि भाजपविरोधात अशी सत्ता-विरोधी लाट का दिसत नाही, असा सवाल उपस्थित केला.

राहुल गांधी यांनी निवडणूक प्रक्रियेतील पारदर्शकता आणि मतदारांच्या मतांच्या सुरक्षेचा मुद्दा पुन्हा उपस्थित केला. त्यांच्या आरोपांवर निवडणूक आयोग आणि सत्ताधारी भाजपकडून वेगळी भूमिका मांडण्यात आली आहे. त्यामुळे या प्रकरणावरून राजकीय वाद आणखी वाढण्याची शक्यता आहे.