Kalyan News | पंतप्रधान नरेंद्र मोदी यांची साडी परिधान केलेली प्रतिमा सोशल मीडियावर प्रसारीत केल्यामुळे कल्याण डोंबिवलीतील काँग्रेसचे ज्येष्ठ नेते मामा पगारे यांच्यावर भाजप पदाधिकाऱ्यांनी संताप व्यक्त केला. इतकेच काय तर, संतप्त भाजप पदाधिकाऱ्यांनी मामा पगारे यांना घेरत जबरदस्तीनं साडी नेसवली होती. ज्याचा व्हिडिओ सोशल मीडियावर तुफान व्हायरल झाला होता. या घटनेनंतर मामा पगारे हे पोलीस स्टेशनला जात असताना त्यांची प्रकृती खालवली होती. त्यामुळे त्यांना रुग्णालयात दाखल करण्यात आले होते. सध्या त्यांच्यावर रुग्णालयात उपचार सूरू आहेत. या प्रकरणाची दखल आता थेट काँग्रेस नेते आणि संसदेतील विरोधी पक्षनेते राहुल गांधी घेतली आहे. प्रकाश पगारे यांच्याशी राहुल गांधी यांनी फोन करुन संवाद साधला आहे. काँग्रेस तुमच्यासोबत.. यावेळी राहुल गांधी यांनी ‘तुम्ही घाबरु नका, काँग्रेस तुमच्यासोबत आहे. आम्हाला तुमच्या बद्दल बाळासाहेब थोरातांनी माहिती दिली आहे. 50 वर्षापासून तुम्ही काँग्रेसचे कार्यकर्ते आहात. तुमचा खूप आदर आहे,’ असा शब्द दिला आहे. राहुल गांधी यांनी केलेल्या फोनवर बोलताना मामा पगारे म्हणाले की, ‘जेव्हा हा प्रकार झाला तेव्हा मी सर्वांत आधी कॉल बाळासाहेब थोरात यांना केला. कारण बाळासाहेब थोरात यांना राहुल गांधी यांच्या कुटुंबातील व्यक्ती म्हणून ओळखले जातात. त्यामुळे बाळासाहेबांनी ताबडतोब ही घटना सांगितली. राहुल गांधी मला बोलले, मामा घाबरू नका. संपूर्ण काँग्रेस पार्टी तुमच्यासोबत आहे. अन्यायाविरूद्ध तुम्ही लढत राहा. मी तुमच्यासोबत आहे, असे मला त्यांनी आश्वासन दिले. मुंबईमध्ये दौरा होईल तेव्हा राहुल गांधी माझी विचारणा करतील एवढं मी निश्चित सांगतो,’ असा विश्वास मामा पगारे यांनी व्यक्त केला. दरम्यान, या घटनेवरून आता भाजप आणि काँग्रेसमध्ये वाद पेटण्याची शक्यता आहे. ज्येष्ठ कार्यकर्त्याला सार्वजनिक ठिकाणी साडी नेसवत अपमानजनक वर्तन केल्याचे म्हणत काँग्रेसने या घटनेचा निषेध केला आहे. हेही वाचा: धक्कादायक! दारात अभ्यास करत असताना बिबट्याचा घात! ७ वर्षीय मुलाचा आईसमोरच दुर्दैवी मृत्यू
