प्रभात वृत्तसेवा
रहिमतपूर – रहिमतपूर नगरपालिकेची निवडणूक लागलेली आहे. निवडणूक आयोगाने रहिमतपुर नगरपालिकेच्या मतदार याद्या प्रसिद्ध केल्यानंतर या यादी मध्ये त्रुटी आढळून आल्याचे दिसून आल्यामुळे राष्ट्रवादी काँग्रेस शरदचंद्र पवार गटाचे जिल्हाध्यक्ष सुनील माने यांनी नगरपालिकेच्या अधिकाऱ्यांना जाब विचारात नगरपालिकेतच धरणे आंदोलन सुरू केले.याबाबत मुख्याधिकाऱ्यांना पत्र देण्यात आले असून या पत्रात चुकीच्या नोंदी केल्याने बी. एल. ओ. ज्योती अभिजीत चव्हाण यांना निलंबित करण्याची मागणी केली आहे.

या मतदारसंघांमध्ये एका मतदाराचे नाव चार ठिकाणी नोंदवण्यात आले आहे . प्रभागातील मतदान घर क्रमांक १४१९ अ, १४१९, १४१८ अ या घरात राहणाऱ्या घरमालकांच्या परस्पर त्यांच्या घरामध्ये 17 अनोळखी मतदारांची नोंद करण्यात आलेली आहे. लोकसभा मतदार यादीतील मतदार यांना काहीही कारण न करता कमी करण्यात आलेली आहे. तर विधानसभेतील मतदार यादीत संबंधित व्यक्तींना पुन्हा समाविष्ट करण्यात आलेले आहे.

काही मतदारांची नावे दुसऱ्या प्रभागात स्थलांतरित केलेली आहेत. रहिमतपूर येथील डॉ. पद्मश्री वसंतदादा पाटील विद्यालय व जुनिअर कॉलेज या संस्थेत रहिवाशी वापर नसतानाही 16 मतदारांची नावे या ठिकाणी राहत असल्याचे मतदार यादीवरून दिसत आहे. अशा प्रकारे अनेक ठिकाणी मतदार यादीत तृटी आढळून आल्यामुळे जिल्हाध्यक्ष सुनील माने यांच्या कार्यकर्त्यांसह नगरपालिकेमध्ये मुख्याधिकारी यांना निवेदन देण्यासाठी गेले होते. परंतु, नगरपालिकेत मुख्याधिकारी उपलब्ध नव्हते.

नगरपालिकेतील कर्मचाऱ्यांनी याबाबत उडवा उडवीची उत्तरे दिल्यामुळे संतप्त झालेल्या सुनील माने व कार्यकर्त्यांनी नगरपालिकेच्या गेटवरच धरणे आंदोलन सुरू केले होते.यावेळी सुनील माने यांच्यासोबत माजी नगराध्यक्ष आनंदा कोरे, माजी उपनगराध्यक्ष विद्याधर बाजारे, माजी नगरसेवक शशिकांत भोसले, विकास तुपे यांच्यासह अनेक कार्यकर्ते उपस्थित होते.