Radhika Apte: प्रसिद्ध अभिनेत्री राधिका आपटे हिने आपल्या प्रेग्नेंसीदरम्यानचा एक धक्कादायक अनुभव नुकताच शेअर केला आहे. ‘फ्रीडम टू फीड’ या नेहा धूपिया यांच्या लाईव्ह सेशनमध्ये राधिकाने सांगितलं की, एका भारतीय निर्मात्याने तिला डॉक्टरकडे देखील जाऊ दिलं नव्हतं. या अनुभवामुळे ती अत्यंत निराश झाली होती.

राधिका आपटे ही केवळ बॉलिवूडमध्येच नव्हे तर हॉलीवूडमध्येही सक्रिय आहे. तिने दोन्ही ठिकाणच्या कामाच्या अनुभवांची तुलना करताना सांगितले की, जेव्हा ती गरोदर होती आणि एका भारतीय निर्मात्याला याची माहिती मिळाली, तेव्हा त्याने खूपच नकारात्मक प्रतिक्रिया दिली. उलट, फॉरेन प्रोड्युसरने सोशल मीडियावर पोस्ट करून तिला शुभेच्छा दिल्या.

ताणात राहून काम करावं लागलं

ती म्हणाली, “मी प्रेग्नंट होते आणि माझं वजन वाढत होतं, तरीही त्या भारतीय निर्मात्याने मला घट्ट कपडे घालण्यास भाग पाडलं. मी तीन महिन्यांची गरोदर होते, मला खूप क्रेविंग्स होत होत्या. मी शारीरिक व मानसिक बदल अनुभवत होते, पण हे सगळं समजून घेण्याऐवजी त्या निर्मात्याने मला त्रासच दिला.”

डॉक्टरकडे जाण्याचीही संधी नाही

“जेव्हा सेटवर मला दुखायला लागलं, बेचैनी जाणवू लागली, तेव्हा मी डॉक्टरकडे जायचं सांगितलं. पण निर्मात्याने स्पष्टपणे नकार दिला. हे ऐकून मी खूप नाराज झाले. त्या प्रसंगाने मला मानसिकरित्या खूप त्रास झाला,” असंही तिने सांगितलं.

बॉलिवूड वि. हॉलीवूड – मोठा फरक

आपल्या अनुभवावर आधारित, राधिका आपटेने सांगितलं की बॉलिवूडमध्ये अजूनही स्त्रीच्या गरजांकडे दुर्लक्ष केलं जातं, विशेषतः प्रेग्नेंसीसारख्या नाजूक काळात. “हॉलीवूडमध्ये लोक सहानुभूती दाखवतात, आनंद व्यक्त करतात, तर भारतात अजूनही कामासाठी शारीरिक त्रास गुपचूप सहन करावा लागतो,” असा स्पष्ट संदेश तिने दिला.