R Sai Kishore Cleans Up Ben Stokes County Championship 2026 Dream Delivery Video Viral : इंग्लंडच्या काउंटी क्रिकेट चॅम्पियनशिप २०२६ मध्ये भारतीय फिरकीपटूंचा जलवा अविरत सुरू आहे. वॉर्विकशायरसाठी मानव सुथारचे ११ विकेट्स आणि यॉर्कशायरसाठी कुलदीप यादवच्या ९ विकेट्सनंतर आता तामिळनाडूचा डावखुरा फिरकीपटू आर. साई किशोरने (R. Sai Kishore) आपल्या जादूई फिरकीने सर्वांचे लक्ष वेधून घेतले आहे. ग्लोस्टरशायरकडून खेळताना साई किशोरने इंग्लंडचा माजी कसोटी कर्णधार बेन स्टोक्सला (Ben Stokes) थेट त्रिफळाचीत करत शानदार बदला घेतला.

पहिल्या दिवशी खातेही उघडू दिले नाही; दुसऱ्या दिवशी स्टोक्सची उडवली दांडी –

चेस्टर-ले-स्ट्रीट मैदानावर डरहमविरुद्ध खेळल्या जात असलेल्या सामन्याच्या पहिल्या दिवशी बेन स्टोक्सने फलंदाजी करत असलेल्या साई किशोरला अवघ्या तीन चेंडूंत शून्यावर त्रिफळाचीत केले होते. मात्र, दुसऱ्या दिवशी गोलंदाजीत साई किशोरने स्टोक्सचा असा काही हिशोब चुकता केला की सारे थक्क झाले. स्टोक्स ४३ चेंडूंत ७ चौकार आणि १ षटकारासह ४५ धावांवर खेळत असताना साई किशोरने टाकलेला अप्रतिम फिरकी चेंडू बॅट आणि पॅडच्या फटीतून थेट स्टंपवर आदळला. या ‘ड्रीम डिलिव्हरी’चा व्हिडीओ सोशल मीडियावर प्रचंड व्हायरल झाला आहे.

भारतीय फिरकीची इंग्लंडच्या खेळपट्ट्यांवर दहशत –

Ben Stokes gets Sai Kishore.

Sai Kishore gets Ben Stokes. pic.twitter.com/DrxtWCUGtU

— Mufaddal Vohra (@mufaddal_vohra) August 28, 2026

यंदाच्या काउंटी हंगामात भारतीय फिरकीपटूंनी वर्चस्व गाजवले आहे. मानव सुथार आणि कुलदीप यादव यांच्या यशस्वी स्पेलनंतर साई किशोरने बेन स्टोक्ससारख्या बलाढ्य फलंदाजाला चकवून काउंटी क्रिकेटमध्ये आपला ठसा उमटवला आहे. फिरकीला फारशी मदत नसणाऱ्या खेळपट्ट्यांवरही भारतीय गोलंदाजांनी प्रतिस्पर्धी फलंदाजांना नाकीनऊ आणले आहे.

हेही वाचा – Gambhir Praises Dinusha : मालिका जिंकली पण विजय हुकला! कोलंबो कसोटीनंतर कोच गंभीरची पोस्ट तुफान व्हायरल, नेमकं कारण काय?

दुलीप ट्रॉफीत दुर्लक्ष; पण काउंटीमध्ये सिद्ध केले स्वतःचे नाणे –

देशांतर्गत क्रिकेटमध्ये सातत्याने विकेट्स मिळवूनही चालू दुलीप ट्रॉफीसाठी साई किशोरला साउथ झोनच्या संघात स्थान मिळाले नव्हते. भारतासाठी त्याने आतापर्यंत केवळ ४ आंतरराष्ट्रीय टी-२० सामने खेळले आहेत. देशांतर्गत पातळीवर सतत दुर्लक्ष होत असताना, थेट काउंटीच्या मैदानावर बेन स्टोक्सची दांडी गुल करत साई किशोरने निवडकर्त्यांना चोख प्रत्युत्तर दिले असून हे त्याच्या कारकिर्दीला नवी दिशा देणारे ठरू शकते.