Purandar News – इंधन तसेच गॅस पुरवठ्याबाबत सध्या नागरिकांमध्ये निर्माण होणारा संभ्रम दूर करण्यासाठी आणि घरगुती गॅसचा काळाबाजार रोखण्यासाठी पुरंदर तालुका प्रशासनाने कडक पावले उचलली आहेत. घरगुती गॅसचा अवैध वापर, साठेबाजी किंवा काळाबाजार करताना कोणी आढळल्यास संबंधितांवर थेट गुन्हे दाखल करण्यात येणार असल्याचा इशारा पुरंदरचे तहसीलदार विक्रम राजपूत यांनी दिला आहे. दरम्यान, तालुका प्रशासनाने विशेष भरारी पथक स्थापन केले आहेत. आंतरराष्ट्रीय स्तरावरील परिस्थितीमुळे इंधन आणि गॅस पुरवठ्याबाबत नागरिकांमध्ये विविध अफवा पसरत असल्याचे प्रशासनाच्या निदर्शनास आले आहे. त्यामुळे नागरिकांमध्ये अनावश्यक भीती किंवा संभ्रम निर्माण होऊ नये यासाठी प्रशासनाकडून विशेष खबरदारी घेतली जात आहे. जिल्हाधिकारी, पुणे यांच्या मार्गदर्शनाखाली घरगुती गॅसचा काळाबाजार रोखण्यासाठी तालुका प्रशासनाने धडक मोहीम हाती घेतली आहे. सर्वसामान्य नागरिकांना आवश्यक घरगुती गॅसचा पुरवठा सुरळीत सुरू राहावा यासाठी प्रशासनाने विविध उपाययोजना केल्या आहेत. यामध्ये गॅस एजन्सींना पारदर्शक पद्धतीने वितरण करण्याच्या सूचना देण्यात आल्या आहेत. इराण-इस्रायल युद्ध कोणत्याही प्रकारे कृत्रिम टंचाई निर्माण होणार नाही, ग्राहकांकडून जास्त दर आकारले जाणार नाहीत आणि घरगुती गॅसचा वापर व्यावसायिक आस्थापनांमध्ये होणार नाही याची खबरदारी घेण्याचे निर्देश देण्यात आले आहेत. सर्व गॅस एजन्सींनी शासनाच्या सूचनांनुसार प्राधान्यक्रम ठरवून वितरण प्रक्रिया पार पाडावी, ग्राहकांना कोणत्याही प्रकारची अडचण येणार नाही याची दक्षता घ्यावी, असेही प्रशासनाने स्पष्ट केले आहे. दरम्यान, तालुक्यातील हॉटेल, ढाबे, उद्योग व इतर व्यावसायिक आस्थापनांनी कोणत्याही परिस्थितीत घरगुती गॅसचा वापर करू नये, असा इशाराही प्रशासनाने दिला आहे. घरगुती गॅसचा व्यावसायिक वापर होत असल्याचे आढळल्यास संबंधितांवर प्रचलित नियमांनुसार थेट गुन्हा दाखल करण्यात येणार असल्याचे तहसीलदार राजपूत यांनी स्पष्ट केले. विविध ठिकाणी अचानक तपासणी होणार काळाबाजार रोखण्यासाठी तालुका प्रशासनाने विशेष भरारी पथक स्थापन केले असून या पथकाच्या माध्यमातून हॉटेल, उद्योग व विविध आस्थापनांची अचानक तपासणी करण्यात येणार आहे. साठेबाजी, अवैध वापर किंवा नफेखोरीचे प्रकार आढळल्यास तात्काळ कठोर कारवाई करण्यात येईल, असेही प्रशासनाने सांगितले. नागरिकांनी अफवांवर विश्वास ठेवू नये किंवा एजन्सीसमोर अनावश्यक गर्दी करू नये. नियमानुसार गॅस बुकिंग करूनच सिलिंडर घ्यावा. तालुक्यात कुठेही घरगुती गॅस काळाबाजार, अवैध वापर किंवा जादा दराने विक्री होत असल्याचे आढळल्यास नागरिकांनी त्वरित प्रशासनाला माहिती द्यावी. अशा प्रकारांवर कठोर कारवाई करण्यात येईल, असेही प्रसिद्धीपत्रकात नमूद करण्यात आले आहे.
