Politics News : पंजाब काँग्रेसचे प्रदेशाध्यक्ष अमरिंदर सिंह राजा वड़िंग यांनी आपल्या पदाचा राजीनामा दिला आहे. बुधवारी रात्री त्यांनी राजीनामा देण्याची तयारी दर्शवली होती. त्यानंतर गुरुवारी त्यांनी ‘एक्स’वरील आपल्या प्रोफाइलमध्ये बदल करत स्वतःचा उल्लेख पंजाब प्रदेश काँग्रेस समितीचे ‘माजी अध्यक्ष’ असा केला. त्यामुळे आता पंजाब काँग्रेसचा नवा प्रदेशाध्यक्ष कोण होणार, याची चर्चा सुरू झाली आहे.

वड़िंग हे लुधियाना लोकसभा मतदारसंघाचे खासदार आहेत. त्यांनी एप्रिल २०२२ मध्ये पंजाब प्रदेश काँग्रेस समितीच्या अध्यक्षपदाची जबाबदारी स्वीकारली होती. आगामी पंजाब विधानसभा निवडणुकीच्या काही महिने आधी हा बदल होत आहे. काँग्रेसकडून लवकरच नव्या प्रदेशाध्यक्षाच्या नावाची घोषणा होण्याची शक्यता आहे.

सचिन पायलट यांच्या अहवालानंतर हालचाली –

काही दिवसांपूर्वी काँग्रेसने पंजाबचे प्रभारी म्हणून भूपेश बघेल यांच्याऐवजी सचिन पायलट यांची नियुक्ती केली होती. पायलट यांनी पंजाबमधील पक्षाच्या वरिष्ठ नेत्यांशी बैठका घेत संघटनेचा आढावा घेतला. त्यानंतर त्यांनी पक्षाच्या वरिष्ठ नेतृत्वाकडे अहवाल सादर केला. या अहवालानंतर प्रदेशाध्यक्ष बदलाचा निर्णय झाल्याचे काँग्रेसमधील सूत्रांनी सांगितले आहे.

वड़िंग-चन्नी गटातील मतभेद

पंजाब काँग्रेसमध्ये गेल्या काही काळापासून राजा वड़िंग आणि माजी मुख्यमंत्री चरणजीत सिंह चन्नी यांच्या समर्थकांमध्ये मतभेद असल्याचे वृत्त आहे. आगामी विधानसभा निवडणुकीच्या पार्श्वभूमीवर पक्षातील अंतर्गत मतभेद कमी करून संघटना मजबूत करण्याचा प्रयत्न काँग्रेसकडून सुरू आहे.

कोणाच्या नावाची चर्चा?

नव्या प्रदेशाध्यक्षपदासाठी माजी मंत्री विजय इंदर सिंगला यांचे नाव आघाडीवर असल्याचे काँग्रेसमधील सूत्रांचे म्हणणे आहे. त्यांच्यासोबत जालंधर कॅन्टचे आमदार परगट सिंह, माजी आमदार राणा के. पी. सिंह, राजा सांसीचे आमदार सुखबिंदर सिंह सरकारिया, माजी मुख्यमंत्री चरणजीत सिंह चन्नी आणि गुरदासपूरचे खासदार सुखजिंदर सिंह रंधावा यांच्या नावांचीही चर्चा आहे. मात्र, अंतिम निर्णय काँग्रेसच्या वरिष्ठ नेतृत्वाकडून होणार आहे.

काँग्रेसकडून पुढील २४ ते ४८ तासांत नव्या प्रदेशाध्यक्षाच्या नावाची घोषणा होण्याची शक्यता असल्याचे वृत्त आहे. त्यामुळे पंजाब काँग्रेसची धुरा कोणाकडे सोपवली जाणार, याकडे राजकीय वर्तुळाचे लक्ष लागले आहे.