पुणे |  भारतीय रिअल इस्टेट क्षेत्राच्या इतिहासात पुण्याच्या शिरपेचात मानाचा तुरा रोवला गेला आहे. पुण्यातील अग्रगण्य कोहिनूर ग्रुप आणि महालक्ष्मी ग्रुप यांच्या भागीदारीने सिंगापूरच्या केपेल लँड या जागतिक कंपनीला १.१ दशलक्ष चौरस फुटांचा ग्रेड AAA आयटी टॉवर यशस्वीपणे सुपूर्द केला आहे. विशेष म्हणजे हा भव्य प्रकल्प अवघ्या २४ महिन्यांच्या विक्रमी कालावधीत पूर्ण करून भारतीय बांधकाम क्षेत्रातील कार्यक्षमता आणि विश्वासार्हतेचे नवे जागतिक मानक प्रस्थापित केले आहे.

पुण्यातील खराडी आयटी कॉरिडॉरमध्ये चार एकर जागेवर उभारलेला हा प्रकल्प महाराष्ट्रातील पहिलाच असा फॉरवर्ड-पर्चेस ऑफिस व्यवहार ठरला आहे, ज्यामध्ये जागतिक स्तरावरील संस्थागत गुंतवणूकदाराचा समावेश आहे. या व्यवहाराला सिंगापूर सरकारच्या टेमासेक होल्डिंग्सचा पाठिंबा लाभला असून त्यांची केपेल लँडमध्ये २१ टक्के भागीदारी आहे. सुमारे ९०० कोटी रुपये मूल्याचा हा व्यवहार भविष्यातील विकासक आणि संस्थागत भागीदारीसाठी एक आदर्श वस्तुपाठ ठरला आहे. या व्यवहाराची रचना अशा पद्धतीने करण्यात आली होती की वेळेत प्रकल्प पूर्ण करण्याची संपूर्ण जबाबदारी विकासकांवर होती आणि कोहिनूर-महालक्ष्मी भागीदारीने ती यशस्वीपणे पेलून आपली व्यावसायिकता सिद्ध केली आहे.

या प्रकल्पाचे डिझाइन सिंगापूरच्या डीपी आर्किटेक्ट्स आणि पुण्याच्या व्हीके:ए आर्किटेक्ट्स यांनी संयुक्तपणे तयार केले आहे. या इमारतीमध्ये तीन बेसमेंट, ग्राउंड फ्लोअर, मेझानाईन, तीन पोडियम स्तर आणि १४ कार्यालयीन मजले आहेत. प्रत्येक मजल्यावर सुमारे ८०,००० चौरस फूट वापरयोग्य क्षेत्र उपलब्ध असून येथे एकाच वेळी ११,००० हून अधिक व्यावसायिक काम करू शकतील. प्रवासासाठी १६ हाय-स्पीड शिंडलर लिफ्ट्स आणि अखंड वीजपुरवठ्यासाठी आधुनिक प्रणाली कार्यान्वित करण्यात आली आहे. पर्यावरणाचे रक्षण करत या प्रकल्पाला आयजीबीसी प्लॅटिनम रेटिंग प्राप्त झाले असून यामध्ये ५०,००० चौरस फुटांचे लँडस्केप क्षेत्र, ग्रीन कॅस्केडिंग बाल्कन्या आणि ५०० आसनांचे भव्य रूफटॉप कॅफेटेरिया अशा जागतिक दर्जाच्या सुविधा देण्यात आल्या आहेत.

या प्रकल्पाच्या यशामुळे पुण्याच्या खराडी परिसराचे महत्त्व जागतिक स्तरावर अधोरेखित झाले असून तो आता बेंगळुरू आणि हैदराबादमधील प्रस्थापित केंद्रांशी स्पर्धा करत आहे. कोहिनूर ग्रुपचे चेअरमन कृष्णकुमार गोयल यांनी या प्रसंगी सांगितले की, हा आंतरराष्ट्रीय दर्जाचा प्रकल्प वेळेत दर्जेदारपणे पूर्ण करणे एक आव्हान होते आणि त्यात १०० टक्के यश मिळाल्याचा सार्थ अभिमान आहे. महालक्ष्मी ग्रुपचे मॅनेजिंग डायरेक्टर मनोज गुप्ता यांनी खराडीचा जागतिक स्तरावर स्पर्धात्मक व्यावसायिक जिल्हा म्हणून झालेला उदय अधोरेखित केला, तर कोहिनूर ग्रुपचे संयुक्त व्यवस्थापकीय संचालक राजेश गोयल यांनी हा प्रकल्प भविष्यातील भागीदारीसाठी एक संदर्भ मॉडेल ठरेल असा विश्वास व्यक्त केला.