Mulshi Water : शहराला मुळशी धरणातून सात टीएमसी पाणी देण्याची सकारात्मक भूमिका राज्य शासनाने घेतल्याने पुणेकरांना मुबलक पाणी मिळण्याचा मार्ग मोकळा होऊ शकतो. शहरासह नव्याने समाविष्ट गावांना पाणी देण्यासाठी महापालिकेला २१.०३ टीएमसी पाण्याची वार्षिक गरज आहे. जलसंपदा विभाग शहराला केवळ १४.६१ टीएमसी पाणी दिले जात आहे. त्यामुळे मुळशी धरणाचे पाणी मिळाल्यास पुणेकरांना मोठा दिलासा मिळणार आहे. मात्र त्याच वेळी महापालिकेस संपूर्ण शहरासाठी पाणी वितरण व्यवस्था उभारावी लागणार आहे. त्यासाठी पुढील तीन ते चार वर्षांत जवळपास चार ते पाच हजार कोटींच्या निधीची गरज लागणार आहे. जलसंपदा विभाग आणि महापालिकेत झालेल्या पाणी वाटप करारानुसार संपूर्ण शहरासाठी केवळ ११.५० टीएमसी पाणीच मंजूर आहे. मात्र प्रत्यक्षात पालिकेचा पाणी वापर २० ते २१ टीएमसी इतका आहे. जलसंपत्ती नियामक प्राधिकरणाच्या सुचनेनुसार महापालिका दरवर्षी शहराचे पाण्याचे अंदाजपत्रक जुलै महिन्यात सादर करते. त्यानुसार संपूर्ण शहराला प्रती व्यक्ती १३५ लिटर पाणी देण्यासाठी सुमारे २१.०३ टीएमसी पाण्याची आवश्यकता आहे. या अंदाजपत्रकानुसार जलसंपदा विभागाने २०२५-२६ या वर्षासाठी महापालिकेस १४.६१ टीएमसी पाणीसाठा मंजूर केला आहे. ८० लाख लोकांना हवे पाणी २०१७ मध्ये ३२ गावांचा समावेश झाल्यानंतर शहराची लोकसंख्या ८० लाख गृहीत धरून त्यानुसार महापालिका पाण्याची मागणी करते. यात ५ टक्के तरल लोकसंख्येचाही विचार करण्यात आला आहे. शहरातील शैक्षणिक संस्था, व्यावसायिक आस्थापना, व्यापारी पेठा तसेच आयटी कंपन्यांमुळे रोजगारासाठी मोठ्या प्रमाणात नागरिक शहरात येतात. त्यामुळे या लोकसंख्येलाही मोठ्या प्रमाणात पाणी द्यावे लागते. सध्या फक्त शहराच्या जुन्या हद्दीतच जलवाहिन्या असून समाविष्ट गावांमध्ये अद्याप जलवाहिन्या नसल्याने तेथे टँकरद्वारे पाणीपुरवठा केला जातो. या गावांचा विचार करता, त्यांना दररोज २५० ते ३०० एमएलडी पाण्याची आवश्यकता आहे. त्यामुळे महापालिकेने २१ टीएमसी पाण्याची अधिकृत मागणी केली होती. प्रत्यक्षात १४.६१ टीएमसीच पाणी मिळत असल्याने पालिकेस दरवर्षी सात टीएमसी अतिरिक्त पाणी उचलावे लागते. त्यासाठी वर्षाला पाणी वापराशिवाय ७० ते ७५ कोटी रुपयांचा दंडही भरावा लागतो. मात्र आता टाटा धरणातून वाढीव पाणी मिळाल्यास महापालिकेचे ७५ कोटी वाचू शकतात. काय आहे पाण्याची सद्यस्थिती ? – शहराची गरज : २१.०३ टीएमसी – मंजूर कोटा : ११.५० टीएमसी – वार्षिक मंजूर पाणी : १४.६१ टीएमसी – प्रत्यक्ष उचलले जाणारे पाणी : २० टीएमसी – वाढीव पाण्यावरील दंड : ७५ ते ८० कोटी Pune District : शिरूर तालुक्यात अवकाळी पावसाचा तडाखा
