Pune ZP School Students:  जागतिक पातळीवरील अंतराळ संशोधन संस्थांना प्रत्यक्ष भेट देऊन विज्ञान-तंत्रज्ञानाचे धडे गिरवण्याची संधी पुणे जिल्ह्यातील जिल्हा परिषद शाळांमधील १०३ विद्यार्थ्यांना मिळाली आहे. पुणे जिल्हा परिषद आणि आयुका यांच्या संयुक्त विद्यमाने आयोजित निवड चाचणीचा अंतिम निकाल आज जाहीर करण्यात आला आहे.

यामध्ये नासा अभ्यासदौऱ्यासाठी २५, युरोपीयन स्पेस एजन्सीसाठी (इएसए) २५ आणि भारतीय अंतराळ संशोधन संस्थेच्या (इस्‍त्राे ) भेटीसाठी ५० विद्यार्थ्यांची अंतिम निवड करण्यात आली असून, इयत्ता ८ वीमधील ३ विद्यार्थ्यांचाही यात समावेश आहे.

​या उपक्रमांतर्गत जिल्हा परिषदेच्या इयत्ता ६ वी ते ८ वीतील विद्यार्थ्यांसाठी तीन टप्प्यांत निवड चाचण्या घेण्यात आल्या होत्या. २५८ विद्यार्थ्यांमधून ‘आयुका’च्या तज्ज्ञ समितीने ४, ५ आणि ६ ऑगस्ट २०२६ रोजी तिसऱ्या व अंतिम फेरीची परीक्षा घेतली होती.

या चाचणीनंतर आयुकाचे प्राध्यापक भूषण गडरे यांनी पुणे जिल्हा परिषदेचे मुख्य कार्यकारी अधिकारी गजानन पाटील यांच्याकडे अंतिम निवड यादी सोपवली.

​निवड झालेल्या विद्यार्थ्यांमध्ये इयत्ता ६ वी आणि ७ वीतील १०० विद्यार्थी असून, त्यापैकी नासासाठी २५, युरोपीयन स्पेस एजन्सीसाठी २५ आणि इस्रो भेटीसाठी ५० विद्यार्थ्यांचा समावेश आहे.

तर इयत्ता ८ वीमधून नासा, इस्रो व युरोपीयन स्पेस एजन्सीसाठी प्रत्येकी १-१ अशा एकूण ३ विद्यार्थ्यांची निवड करण्यात आली आहे. याशिवाय एकूण २७ विद्यार्थ्यांची प्रतीक्षा यादी देखील तयार करण्यात आली आहे.