Pune ZP President – पुणे जिल्हा परिषदेतील तब्बल चार वर्षांचे प्रशासक राज अखेर संपुष्टात आले असून, बुधवारी जिल्ह्याला नवे कारभारी मिळाले आहेत. जिल्हा परिषदेच्या अध्यक्षपदी दौंडचे वीरधवल जगदाळे यांची, तर उपाध्यक्षपदी आंबेगावचे विवेक वळसे पाटील यांची बिनविरोध निवड करण्यात आली. जिल्हाधिकारी जितेंद्र डुडी यांच्या अध्यक्षतेखाली पार पडलेल्या पहिल्या विशेष सर्वसाधारण सभेत ही निवडणूक प्रक्रिया पार पडली. या वेळी जिल्हा परिषदेचे मुख्य कार्यकारी अधिकारी गजानन पाटील, उपजिल्हाधिकारी चारुशिला देशमुख-मोहिते, अतिरिक्त मुख्य कार्यकारी अधिकारी चंद्रकात वाघमारे, उपमुख्य कार्यकारी अधिकारी श्रीकांत खरात, भूषण जोशी, जिल्हा परिषदेचे नवनिर्वाचित सदस्य, पंचायत समितीचे सभापती आदी उपस्थित उपस्थित होते. अध्यक्षपदासाठी राष्ट्रवादी काँग्रेसतर्फे वीरधवल जगदाळे आणि उद्धव बाळासाहेब ठाकरे गटाचे विजयसिंह शिंदे यांनी अर्ज दाखल केले होते. मात्र, राष्ट्रवादीच्या सदस्यांच्या विनंतीला मान देत शिंदे यांनी आपला अर्ज मागे घेतल्याने जगदाळे यांची बिनविरोध निवड झाली. उपाध्यक्षपदासाठीही शिवसेनेच्या (शिंदे गट) मंगेश काकडे यांनी माघार घेतल्याने विवेक वळसे पाटील यांची बिनविरोध निवड झाली. नवनिर्वाचित अध्यक्ष जगदाळे हे दौंड तालुक्यातील खडकी गटातून तिसऱ्यांदा निवडून आले असून, त्यांना प्रशासकीय आणि सहकार क्षेत्राचा अनुभव आहे. यापूर्वी त्यांनी नगराध्यक्ष आणि जिल्हा कबड्डी असोसिएशनचे उपाध्यक्ष म्हणूनही काम पाहिले आहे. उपाध्यक्ष विवेक वळसे पाटील हे दुसऱ्यांदा जिल्हा परिषदेवर निवडून आले असून, त्यांनी यापूर्वीही उपाध्यक्षपदाची जबाबदारी यशस्वीपणे सांभाळली आहे.
