Pune Zilla Parishad – पुणे जिल्हा परिषदेच्या बहुचर्चित आणि महत्त्वाकांक्षी ‘मॉडेल स्कूल’ प्रकल्पातील अनियमिततेच्या तक्रारींवर जेवढे काम प्रत्यक्षात पूर्ण झाले असेल, तेवढाच निधी ठेकेदारांना दिला जाईल. अतिरिक्त निधी त्वरित मागे घेतला जाईल, असा इशारा जिल्हा परिषद अध्यक्ष वीरधवल जगदाळे यांनी दिला आहे. कामात अनियमितता आढळल्यास दोषींवर कारवाई केली जाईल, असेही त्यांनी पत्रकार परिषदेत सांगितले.

गेल्या काही दिवसांपासून मॉडेल स्कूल आणि मॉडेल प्राथमिक आरोग्य केंद्र प्रकल्पांतील कोट्यवधी रुपयांच्या कामांवरून सत्ताधारी सदस्य आणि प्रशासनात तीव्र खडाजंगी सुरू होती. ठराविक ठेकेदारांनाच वारंवार कंत्राटे दिली जात असल्याचा आरोप करत लोकप्रतिनिधींनी प्रशासनाला धारेवर धरले होते. मागील वर्षी निवडलेल्या ३०३ शाळांसाठी जिल्हा नियोजन समितीतर्फे ३५० कोटींचा भरघोस निधी मंजूर केला होता.

१० जून २०२५ ची मुदत उलटूनही अनेक कामे अपूर्ण असताना, पुन्हा ६०० नवीन शाळांसाठी निधीची तरतूद करण्यावर सदस्यांनी तीव्र आक्षेप घेतला होता. या पार्श्वभूमीवर जगदाळे म्हणाले, की सध्या २९९ शाळांमध्ये १६५ कोटी रुपये खर्चाचे नवीन बांधकाम सुरू आहे. त्यापैकी ३५ कामे पूर्ण झाली असून, २४९ कामे प्रगतीपथावर आहेत.

१५ शाळांचे काम अद्याप सुरू झालेले नाही. अनियमिततेच्या तक्रारी आलेल्या शाळांची प्रत्यक्ष स्थळ पाहणी करून पडताळणी केली जाईल. दरम्यान, मॉडेल स्कूल प्रकल्पामुळे जिल्हा परिषदेच्या शाळांचा बौद्धिक स्तर उंचावला असून, पटसंख्या वाढल्याचाही दावा जगदाळे यांनी केला.