Pune: विस्डम वर्ल्ड स्कूलने ICSE 2026 परीक्षेत उल्लेखनीय यश संपादन करत शैक्षणिक क्षेत्रात आपली छाप अधिक ठळक केली आहे. वाकड आणि हडपसर (अमानोरा) या दोन्ही कॅम्पसमधील विद्यार्थ्यांनी उत्कृष्ट कामगिरी करत शाळेचा निकाल शंभर टक्के लागला आहे. हडपसर कॅम्पसमधील सातव्या ICSE बॅचमध्ये इशान महेश दळवी याने 99.4 टक्के गुणांसह प्रथम क्रमांक पटकावला. त्यापाठोपाठ शौर्य अजय शर्मा (99%) आणि आलोकि प्रसाद धोतरे (98.8%) यांनी उज्ज्वल यश मिळवले. या कॅम्पसमधील 105 पैकी 63 विद्यार्थ्यांनी (60%) 90 टक्क्यांहून अधिक गुण मिळवले, ही नवोदित कॅम्पससाठी उल्लेखनीय बाब ठरली आहे. वाकड कॅम्पसमध्ये आर्चिशा पाठक हिने 99.2 टक्के गुणांसह अव्वल स्थान पटकावले, तर सुदिती बसू हिने 99 टक्के गुण मिळवले. 98 ते 98.8 टक्क्यांदरम्यान गुण मिळवणाऱ्या विद्यार्थ्यांमध्ये मुग्धा कुलकर्णी, रिद्धी बाफना, सोहम मोटवानी, श्रिया कुलकर्णी आणि संभव श्रीवास्तव यांचा समावेश आहे. या कॅम्पसमधील एकूण 151 पैकी 101 विद्यार्थ्यांनी 90 टक्क्यांहून अधिक गुण मिळवले असून, त्यापैकी 50 विद्यार्थ्यांनी 95 टक्क्यांपेक्षा जास्त गुण मिळवले आहेत. निकालाबाबत बोलताना शाळेच्या अध्यक्षा डॉ. तृप्ती अग्रवाल यांनी विद्यार्थ्यांच्या मेहनतीचे कौतुक केले. “विद्यार्थ्यांनी दाखवलेली जिद्द आणि परिश्रम अभिमानास्पद आहेत. केवळ गुण नव्हे, तर त्यांनी विकसित केलेला आत्मविश्वास आणि चिकाटी अधिक महत्त्वाची आहे,” असे त्या म्हणाल्या. विस्डम वर्ल्ड स्कूलचा हा निकाल त्यांच्या समतोल शिक्षणपद्धतीचे प्रतीक मानला जात असून, शैक्षणिक उत्कृष्टतेसोबतच विद्यार्थ्यांच्या सर्वांगीण विकासावर दिलेले लक्ष या यशामागील प्रमुख घटक असल्याचे स्पष्ट झाले आहे.
