प्रभात वृत्तसेवा पुणे – सलग दुसऱ्या दिवशी कमाल व किमान तापमानात घट झाल्यामुळे शहरासह उपनगरातील थंडीचा जोर काहीसा कमी झाला आहे. हुडहुडी भरणारी थंडी कमी झाल्याने पुणेकरांना दिलासा मिळाला असून, पुढील दोन ते तीन दिवस कमाल व किमान तापमानात काही अंशी वाढ होईल. आकाश निरभ्र तर दुपारनंतर ढगाळ वातावरणाचा अंदाज पुणे वेधशाळेने वर्तविला आहे. त्यामुळे थंडीचा जोर कमी होण्याची शक्यता वेधशाळेने वर्तविली आहे. मागील आठ दिवसांपासून हुडहुडी भरणाऱ्या थंडीने पुणेकर चांगलेच गारठले. किमान तापमानाने हंगामातील निच्चांक गाठला. परिणामी ही लाट किती दिवस राहणार असे वाटत असताना हवामानातील बदलामुळे २४ तासांतच किमान तापमानात एक अंशाने वाढ झाली. तर गेल्या ४८ तासांत दोन ते तीन अंशाने किमान तापमानात वाढ झाल्यामुळे कडाक्याची थंडी कमी झाली आणि पुणेकरांना दिलासा मिळाला. शुक्रवारी (दि. २१) शहरातील किमान व कमाल तापमानात काही अंशी वाढ झाली. हवेली परिसरात सर्वात कमी ९.८ तर माळीण येथे १०.४ अंश सेल्सिअस किमान तापमानाची नोंद झाली. तर कोरेगाव पार्क येथे सर्वाधिक ३१.३ अंश सेल्सिअस कमाल तापमानाची नोंद झाली. शहराच्या मध्यवर्ती भागापेक्षा उपनगरातील एनडीए, पाषाण, वारजे, कात्रज, धायरी परिसरात थंडीचा जोर जाणवत होता. दरम्यान, पुढील दोन ते तीन दिवस शहरासह जिल्ह्यातील किमान तापमान १० ते १२ अंशाच्या आसपास राहील, त्यामुळे थंडीचा जोर कमी राहील, असे वेधशाळेकडून सांगण्यात आले. शहरासह जिल्ह्यातील किमान तापमान हवेली ९.८, माळीण १०.४, पाषाण १०.९, शिवाजीनगर ११, तळेगांव दाभाडे ११.५, आंबेगांव ११.९, निमगिरी १२.१, बारामती १२.७, भोर १४, कोरेगांव पार्क१५.३ अंश सेल्सिअस किमान तापमानाची नोंद झाली.
