Pune Weather – शहरासह जिल्ह्यातील वाढत्या कमाल तापमानामुळे उन्हाचा चटका वाढला असून, सलग दुसऱ्या दिवशी उष्णतेचा पारा ३८ अंशांपर्यंत पोहोचला. परिणामी उकाड्याने पुणेकर घामाघूम झाले असून, लोहगाव येथे सर्वाधिक ३७.८ अंश सेल्सिअस कमाल तापमानाची नोंद झाली. सलग दुसऱ्या दिवशी शहरासह उपनगरांतील कमाल तापमानात एक ते दोन अंशाने वाढ झाली. त्यामुळे ३३ ते ३५ अंशांवरील उष्णतेचा पारा ३६ ते ३७ अंशावर पोहोचला. उपनगरातील एनडीए, पाषाण आणि हवेली परिसरातील काही भाग सोडला, तर अन्य परिसरात पहाटेचा गारवा गायब झाला असून, सकाळी अकरा वाजल्यापासून उन्हाचा चटका जाणवत आहे. दुपारी पारा ३७ ते ३८ अंशांपर्यंत पोहोचल्यामुळे घामाघूम होईल, असा कडक उन्हाचा चटका जाणवत आहे. दिवसभरातील लोहगाव पाठोपाठ वडगावशेरी, चिंचवड, शिवाजीनगर, हडपसर या परिसरात पारा वाढल्यामुळे कमाल तापमान ३६ अंशांच्या पुढे नोंदविले. दरम्यान, पुढील दोन दिवस शहरासह जिल्ह्यातील हवामान कोरडे, तर आकाश निरभ्र राहील. कमाल व किमान तापमानात काही अंशी वाढ होण्याची शक्यता असल्याने उन्हाचा चटका वाढण्याची शक्यता पुणे वेधशाळेने वर्तविली आहे. प्रमुख भागातील कमाल तापमान लोहगाव ३७.७, वडगावशेरी ३६.९, गिरीवन ३६.३, चिंचवड ३६.२, शिवाजीनगर ३६, बारामती ३५.९, दापोडी ३५.८, हडपसर ३५.३, हवेली ३४.९, भोर ३४.४, आंबेगाव ३४ अंश सेल्सिअस.
