Pune Crime News : पहाटेच्या भयाण शांततेत अचानक कुत्र्यांच्या भुंकण्याने काळजात धडकी भरली अन् जीवाच्या आकांताने दोघे मित्र पळू लागले. त्याचवेळी संशयातून या तरुणांचा टोळक्याने पाठलाग केला. दुर्दैवाने, पळताना १९ वर्षीय तरुणाचा पाय घसरला आणि तो या टोळक्याच्या तावडीत सापडला. टोळक्याने बॅट आणि लाथाबुक्क्यांनी केलेल्या बेदम मारहाणीत तरुणाचा मृत्यू झाल्याची घटना वानवडी परिसरात बुधवारी (दि. १८) पहाटे घडली. याप्रकरणी वानवडी पोलिसांनी पाच जणांवर खुनाचा गुन्हा दाखल केला आहे. रुपेश धनराज शिंदे (वय १९, रा. मोशी, पिंपरी चिंचवड) असे मृत तरुणाचे नाव आहे. याबाबत त्याचे वडील धनराज बळीराम शिंदे (वय ४५) यांनी वानवडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, रुपेश शिंदे आणि त्याचा मित्र अजय गणेश टिंगरे (वय २०) हे दोघे बुधवारी (दि. १८) पहाटे अडीच ते तीन वाजेच्या सुमारास दुचाकीवरून मोशीच्या दिशेने जात होते. हडपसर येथील शंकरमठ परिसरातून जात असताना ते लघुशंकेसाठी थांबले. त्यानंतर ते जवळच असलेल्या पवार एन्क्लेव्ह सोसायटीसमोर कॅनाललगतच्या एका मोकळ्या जागेत गेले. त्या ठिकाणी कबुतरे ठेवण्याचे बॉक्स होते. दोघेजण तिथे गेले असता अचानक कुत्र्यांनी जोरात भुंकायला सुरुवात केली. कुत्र्यांच्या आवाजाने कुणीतरी शिरल्याचा संशय निर्माण झाला आणि तेथील काही रहिवाशांनी त्यांचा पाठलाग सुरू केला. दुसरीकडे भीतीपोटी रुपेश आणि अजय तिथून सैरावैरा पळू लागले. पळताना मुख्य रस्त्यावर जिनमाता मोटर्ससमोर रुपेशचा पाय घसरला आणि तो खाली पडला. त्यावेळी रूपेश या टोळक्याच्या ताब्यात सापडला. पाठलाग करणाऱ्या पाच जणांनी रुपेशला क्रिकेटच्या बॅटने डोक्यात व अंगावर बेदम मारहाण केली. या भीषण हल्ल्यात गंभीर जखमी झालेल्या रुपेशला तत्काळ जवळील रुग्णालयात नेण्यात आले. मात्र, त्याचा मृत्यू झाला. या घटनेची माहिती मिळताच वानवडी पोलिसांनी घटनास्थळी धाव घेतली. याप्रकरणी पाच जणांविरुद्ध खुनाचा गुन्हा दाखल करण्यात आला आहे. वानवडी पोलीस पुढील तपास करीत आहेत.