Pune |  पुणे शहरातील अनेक ठिकाणी वाहनचालक नो पार्किंगमध्ये वाहने उभी करत असतात. अशा वाहनचालकांवर पोलिस दंडात्मक कारवाई करत असते. पण चक्क पुण्यातील नो पार्किंगमध्ये वाहने उभे करणाऱ्या वाहनांना घेऊन जाणाऱ्या टोईंग वाहनावरच पोलिसांनी दंडात्मक कारवाई केली आहे. नियम मोडणाऱ्या टोईंग वाहनाला पुणे पोलिसांनी दणका देत ५०० रुपयांचा दंड वसून केला आहे.

पुणे शहरात नो-पार्किंग, सिग्नल जम्प करणे, विनाहेल्मेट, विरुद्ध दिशेने गाडी दामटणाऱ्या वाहनांवर वाहतूक पोलीस नियमितपणे कारवाई करत असतात. मात्र, या वाहतूक पोलिसांच्याच दिमतीला असलेल्या गाडीने उल्लंघन, नियमभंग करणाऱ्या टोईंग वाहनावर पोलिसांनी दंडात्मक कारवाई केली आहे. गेल्या काही दिवसांपासून पुणेकरांनी याविषयी नेहमीच प्रश्न केला होता. त्यावर पोलिसांनी नो-पार्किंगमधील वाहने उचलणाऱ्या टोईंगच्या गाडीने नियम मोडल्यानै दंडात्मक कारवाई केली आहे.

पुण्यातील कोंढवा परिसरात गेल्या काही दिवसांपूर्वी टोईंग व्हॅन चुकीच्या बाजूने जात असताना आढळून आली होती. पुणे पोलिसांनी याच वाहनांवर दंडात्मक कारवाई केली आहे. पोलिसांनी केलेल्या या कारवाईचे कौतुक करण्यात येत आहे. मात्र, अनेकदा वाहन उचलून नेणाऱ्यांकडून वाहनाच्या मालकाला अरेरावीची भाषा केली जात असल्याच्या देखील अनेक घटना घडलेल्या आहेत. यामुळे वाहन नो पार्किंगमधून उचलून नेत असताना त्या ठिकाणी आलेल्या मालकासोबत यांचे असभ्य वर्तन असते. अनेकदा असे प्रकार समोर येत असतात. यावर काही कारवाई होणार का असा प्रश्न देखील विचारला जात आहे.