Pune Traffic Police – पुणे शहर पोलिस तब्बल १९ लाखांहून अधिक प्रलंबित ई-चलनांच्या ४१० कोटी रुपयांपेक्षा जास्त रकमेच्या वसुलीसाठी विशेष मोहीम हाती घेतली आहे. या अंतर्गत थकबाकीदार वाहनमालकांना औपचारिक नोटीस पाठविण्याची प्रक्रिया सुरू करण्यात आली आहे. मागील पाच वर्षांपासून आणि त्यापूर्वीच्या काळातील अनेक वाहतूक उल्लंघन प्रकरणांतील दंड अद्यापही भरलेले नाहीत. त्यामुळे कोट्यवधी रुपयांची थकबाकी साचली आहे. अतिरिक्त पोलीस आयुक्त मनोज पाटील यांनी सांगितले की, वाहतूक नियमांचे उल्लंघन करणाऱ्यांविरुद्ध जारी केलेले १९ लाखांहून अधिक ई-चलान अद्याप थकीत आहेत. ही रक्कम वसूल करण्यासाठी विशेष मोहीम राबवली जात आहे. पोलीस उपायुक्त (वाहतूक) हिम्मत जाधव यांनी सांगितले की, २६ फेब्रुवारी ते १ मार्च या कालावधीत नोंदणीकृत मोबाइल क्रमांकावर एसएमएसद्वारे नोटीस पाठविण्यात येतील. हे संदेश केवळ MHPECH-G या अधिकृत शॉर्ट कोडवरूनच येतील. नोटीस मिळाल्यानंतर संबंधित वाहनमालकाने ३० दिवसांच्या आत अधिकृत संकेतस्थळ : https://mahatrafficechallan.gov.in, पुणे ट्रॅफिक पोलिसांचे अधिकृत पीटीपी ॲप जवळच्या वाहतूक विभाग कार्यालयात जाऊन क्यूआर कोड, डेबिट/क्रेडिट कार्डद्वारे पेमेंट यावर दंड भरणे आवश्यक आहे. अन्यथा ड्रायव्हिंग लायसन्स निलंबित किंवा न्यायालयात चलन खटला दाखल करणे, अशी कारवाई करण्यात येणार आहे. फसवणुकीपासून सावध राहा… पोलिसांनी नागरिकांना सायबर फसवणुकीबाबतही सतर्क केले आहे. कोणतीही एपीके फाइल किंवा संशयास्पद लिंक उघडू नये. ओटीपी कोणाशीही शेअर करू नये, अधिकृत पद्धतीनेच पेमेंट करावे, संशयास्पद कॉल किंवा मेसेज आल्यास पोलीस ठाण्यात तक्रार नोंदवावी.
