Pune Tourism – शहरासह जिल्ह्यात पावसाची संततधार सुरू असून, पुण्याच्या घाटमाथ्यावर आणि सह्याद्रीच्या डोंगररांगा हिरवाईने नटले आहे. डोंगरमाथ्यावरून फेसाळणारे धबधबे सुरू झाले असून, निसर्गाचे हे देखणे, विलोभनीय आणि मनाला भुरळ घालणारे रूप डोळ्यांत साठवण्यासाठी रविवारी (दि. ५) सुट्टीचा आनंद घेण्यासाठी तरुणांसह कुटुंबीयांनी पुण्याच्या आसपासच्या निसर्गाकडे धाव घेतली.

त्यामुळे मुळशी, पवना, लोणावळा, एकवीरा देवी, खडकवासला, राजगड, पानशेत, वरसगाव, लवासा, सिंहगड, नाणेघाट, शिवनेरी यासह अन्य ठिकाणी पर्यटकांनी गर्दी केली होती.
पावसाळ्यात फेसळणाऱ्या धबधब्यांसह लोणावळा येथील भुशी डॅम भरताच पर्यटकांची मोठी गर्दी होते. त्यातच दोन दिवसांपूर्वीच हा भुशी डॅम भरून वाहू लागल्यामुळे पर्यटकांचा उत्साह ओसंडून वाहू लागला आणि आज सकाळपासून याठिकाणी गर्दी झाली.

मात्र, सुरक्षेचा उपाय म्हणून पोलिसांनी पर्यटकांना मुख्य डॅमच्या पायऱ्यांवर जाण्यास मज्जाव करत खालीच थांबण्याचे निर्देश दिले. याशिवाय ताम्हिणी घाटमाथा परिसरात पावसाचा जोर जास्त असल्याने संभाव्य धोका लक्षात घेऊन आणि अपघात टाळण्यासाठी मुळशी पोलिसांनी घाटात पर्यटकांच्या गाड्यांना पुढे जाण्यास बंदी घातली. त्यामुळे काही पर्यटकांच्या आनंदावर विरजण पडले. मात्र, बहुतांश नागरिकांनी प्रशासनाला सहकार्य करत,

लांबूनच उंचावरून कोसळणारे धबधबे पाहण्याचा, पावसात भिजण्याचा आणि घाटातील हिरवाईसह गडद धुक्याचा मनमुराद आनंद लुटला. विशेषत: पुणेकरांची तहान भागवणाऱ्या खडकवासला, पानशेत, वरसगाव या धरण परिसरासह सिंहगडावर निसर्गाचा मनमोहक नजारा अनुभवण्यासाठी पुणेकरांची गर्दी केली. गरमागरम भजी, मक्याचे कणीस खात पर्यटकांनी पावसात भिजण्याचा आनंद घेतला.

मात्र, परतीच्या प्रवासाला सायंकाळी खडकवासला, सिंहगड, धायरी रोड या मार्गावर पर्यटकांच्या वाढत्या गर्दीने वाहतूक कोंडी झाली, तसेच मुळशी, लोणावळा, कामशेत, राजगड, भोर, पवना यासह अन्य महामार्गांवरही वाहतूक कोंडी झाल्यामुळे दिवसभराचा पर्यटनाचा आनंद संध्याकाळी वाहतूक कोंडीत मावळला.