Pune News : ‘पुण्यातील सनसिटी परिसरातून एका मुलीचे अपहरण करण्यात आले’, ‘मदत मागण्याच्या बहाण्याने मुलीला पळवून नेले’, तसेच ‘गेल्या २२ दिवसांत पुणे शहरातून १२३ मुली गायब झाल्या असून, राज्यातून तब्बल २३ हजार मुली बेपत्ता आहेत’, अशा दाव्यांच्या ऑडिओ आणि व्हिडिओ क्लिप सध्या समाज माध्यमांवर मोठ्या प्रमाणात फिरत आहेत. (Pune News)

या क्लिपची कोणतीही खातरजमा न करता अनेकांकडून त्या पुन्हा तयार करून सोशल मीडियावर प्रसारित केल्या जात असल्याने शहरात महिलांच्या सुरक्षेबाबत चर्चेला उधाण आले आहे. दरम्यान, या प्रकारामुळे पोलिसांचीही चांगलीच धावपळ उडाली असून, संबंधित व्हिडिओ सर्वप्रथम कोणी तयार केला आणि त्यातील दाव्यांचा आधार काय, याचा शोध पोलिसांकडून घेतला जात आहे. (Pune News)

गेल्या दोन-चार दिवसांपासून महिलांच्या सुरक्षेशी संबंधित विविध पोस्ट, व्हिडिओ आणि ऑडिओ क्लिप समाज माध्यमांवर मोठ्या प्रमाणात प्रसारित होत आहेत. यामध्ये एका महिलेने तिच्या इन्स्टाग्राम अकाऊंटवरून प्रसारित केलेली एक क्लिप मोठ्या प्रमाणात व्हायरल झाल्याचे दिसून येत आहे. (Pune News)

या क्लिपचा संदर्भ देत इतरांकडूनही त्याच आशयाचे व्हिडिओ तयार केले जात असून, त्यामध्ये विविध दावे केले जात आहेत. विशेष म्हणजे, या क्लिपमध्ये पुण्यातील सनसिटी परिसराचा उल्लेख करण्यात आल्याने अनेक नागरिकांनी थेट पोलिसांशी संपर्क साधण्यास सुरुवात केली. (Pune News)

सिंहगड रस्ता पोलिस ठाण्यातही या संदर्भात मोठ्या प्रमाणात फोन येत आहेत. ‘सनसिटीमध्ये नेमके काय घडले?’, ‘मुलीचे अपहरण झाले आहे का?’, अशा स्वरूपाच्या विचारणा नागरिकांकडून केल्या जात आहेत. (Pune News)

मात्र, समाज माध्यमांवर व्हायरल होत असलेल्या दाव्यांची सत्यता आणि त्यामागील नेमकी वस्तुस्थिती अद्याप स्पष्ट झालेली नाही. त्यामुळे केवळ व्हायरल क्लिपच्या आधारे निष्कर्ष काढणे अथवा ती पुढे प्रसारित करणे टाळण्याचे आवाहन पोलिसांनी केले आहे. (Pune News)

शिक्षित नागरिकांकडूनही फॉरवर्ड

समाज माध्यमांवरील संदेशांची सत्यता तपासण्याची कोणतीही तसदी न घेता अनेक नागरिक हे व्हिडिओ पुढे पाठवत आहेत. त्यामध्ये सुशिक्षित नागरिकांचाही समावेश आहे. एकाच क्लिपचा संदर्भ घेऊन त्यावर आधारित नवनवीन व्हिडिओ तयार होत असल्याने मूळ माहितीपेक्षा अफवा अधिक वेगाने पसरत असल्याचे चित्र आहे. त्यामुळे महिलांच्या सुरक्षेचा संवेदनशील विषय अनावश्यक भीतीचे वातावरण निर्माण करण्यास कारणीभूत ठरत आहे. (Pune News)

मूळ क्लिप टाकणाऱ्या महिलेचा शोध

या पार्श्वभूमीवर पोलिसांनी संबंधित क्लिपचा स्रोत शोधण्यास सुरुवात केली आहे. इन्स्टाग्रामवरून मूळ क्लिप प्रसारित करणाऱ्या महिलेची माहिती घेण्यात येत असून, तिने केलेल्या दाव्यांचा आधार काय आहे, याचीही खातरजमा केली जात आहे. (Pune News)

दरम्यान, महिलांच्या सुरक्षेबाबत नागरिकांनी सतर्क राहणे आवश्यक असले तरी, अपुरी किंवा खोटी माहिती समाज माध्यमांवर पसरविल्याने पोलिस यंत्रणेवर विनाकारण ताण निर्माण होतो. त्यामुळे कोणतीही क्लिप अथवा संदेश पुढे पाठविण्यापूर्वी त्याची अधिकृत स्त्रोताकडून खातरजमा करणे आवश्यक आहे. (Pune News)

याप्रकारच्या कोणत्याची घटनेची तक्रार सिंहगड पोलीस ठाण्यात दाखल झाली नाही. तसेच कोणी तशी माहिती देण्यासही पुढे आले नाही. – विनय पाटणकर (वरिष्ठ पोलीस निरीक्षक, सिंहगड पोलीस ठाणे)

“सोशल मीडियावर प्रसारित होत असलेल्या रील्स आणि ऑडिओ रेकॉर्डिंगच्या अनुषंगाने गुन्हे शाखा तसेच स्थानिक पोलिसांकडून या प्रकरणाची पडताळणी करण्यात आली आहे. ऑडिओ रेकॉर्ड करणाऱ्या व्यक्तीशी संपर्क साधून तिच्याशी चर्चा करण्यात आली आहे. तसेच संबंधित सोसायटीचे व्यवस्थापन, शेजारी आणि इतर संबंधित व्यक्तींकडूनही माहिती घेण्यात आली आहे. सद्यस्थितीत अशा प्रकारची कोणतीही घटना घडल्याचे सिद्ध करणारी माहिती किंवा पुरावा तपासात समोर आलेला नाही. मात्र, या प्रकरणाची सविस्तर चौकशी सुरू आहे. चौकशीदरम्यान आणखी काही तथ्य किंवा पुरावे समोर आल्यास त्यानुसार योग्य ती कारवाई करण्यात येईल आणि त्याबाबतची माहिती कळविण्यात येईल.” – गौहर हसन, पोलीस उपायुक्त (गुन्हे शाखा)

Pune News : मोबाईल फॉरमॅट केल्याच्या रागातून तरुणाला बेदम मारहाण; राजकीय पक्षाच्या कार्यकर्त्यावर गुन्हा दाखल