Pune accident : पुणे-सासवड रस्त्यावरील वडकी येथील दहाव्या मैलाजवळ सर्व्हिस रोडवर अंधारात धोकादायक पद्धतीने उभ्या केलेल्या कंटेनरला कारने पाठीमागून जोरदार धडक दिली. या भीषण अपघातात कारमधील दोघांचा मृत्यू झाला, तर कारचालक किरकोळ जखमी झाला. मंगळवारी (दि. १०) मध्यरात्री सव्वाबारा वाजण्याच्या सुमारास हा अपघात घडला.

संजय वसंत मोडक (वय ४९) आणि अविनाश बाळासाहेब अर्णे (वय ३५, दोघे रा. दहावा मैल, वडकी, ता. हवेली) अशी मृतांची नावे आहेत. याप्रकरणी सुनील दिंगबर मोडक (वय ३९, रा. दहावा मैल, वडकी) यांनी फिर्याद दिली आहे. त्यानुसार फुरसुंगी पोलिसांनी कंटेनरचालकाविरुद्ध गुन्हा दाखल केला आहे.

पोलिसांनी दिलेल्या माहितीनुसार, कंटेनरचालकाने हरियाणा पासिंगचा (एचआर ५६ सी २८४४) कंटेनर हडपसरच्या दिशेने जाणाऱ्या सर्व्हिस रोडवर उभा केला होता. या ठिकाणी वाहन पार्किंगला परवानगी नसतानाही त्याने कंटेनर उभा केला. विशेष म्हणजे, रात्रीच्या अंधारात कंटेनर उभा करताना पार्किंगचे दिवेही सुरू ठेवले नव्हते. तसेच, वाहनामागे सुरक्षिततेच्या दृष्टीने कोणतीही उपाययोजना केली नव्हती.

त्यामुळे फिर्यादी यांच्या कारची कंटेनरला पाठीमागून जोरदार धडक बसली. या अपघातात संजय मोडक आणि अविनाश अर्णे यांचा मृत्यू झाला, तर कारचेही मोठे नुकसान झाले. अपघातानंतर कंटेनरचालक घटनास्थळावरून निघून गेला असून, त्याची ओळख पटलेली नाही.

या प्रकरणी फुरसुंगी पोलिस ठाण्यात भारतीय न्याय संहितेच्या विविध कलमांसह मोटार वाहन कायद्यानुसार गुन्हा दाखल करण्यात आला आहे. वरिष्ठ पोलीस निरीक्षक अमोल मोरे यांच्या मार्गदर्शनाखाली सहायक पोलीस निरीक्षक नानासाहेब जाधव यांनी गुन्हा दाखल केला असून, पोलीस उपनिरीक्षक संतोष मोरे तपास करीत आहेत.