प्रभात वृत्तसेवा
पुणे – रविवारी मध्यरात्रीपासून शहरासह उपनगरांत पावसाचा जोर वाढल्यामुळे रस्त्यावर पाण्याचे पाट वाहू लागले. चिंचवड परिसरात सर्वाधिक ६६ मिमी पावसाची नोंद झाली. लोहगाव परिसरात ५२, पाषण येथे ४३, तर शिवाजीनगर परिसरात ३७ आणि कोरेगाव पार्क येथे २८ मिमी पावसाची नोंद झाली. हा पाऊस चार ते पाच तास झाला असून, रविवारी (दि. २८) सकाळीही पावसाची रिपरिप सुरूच होती. दिवसभर पाऊस आणि ढगाळ वातावरणामुळे हवेत चांगलाच गारवा वाढला होता.

शहर आणि जिल्ह्यात मागील आठवडाभरापासून पाऊस हजेरी लावत आहे. गेल्या ४८ तासांत पावसाचा जोर वाढला असून, शनिवारी पहाटे जोरदार, तर काही ठिकाणी अतिजोरदार सरी पडल्या. त्यानंतर दिवसभर पावसाच्या हलक्या सरी पडल्या. मात्र, रात्री दहानंतर शहरासह जिल्ह्यात पावसाचा जोर वाढला आणि धो- धो पावसाने रस्त्यांसह चौकांमध्ये पाणीच पाणी झाले. आज (दि. २८) सकाळपासून पावसाचा जोर कायम असून, दिवसभर हलका ते मध्यम सरी पडल्या.

कोथरूड, पाषाण, शिवाजीनगर भागांसह जिल्ह्यातील निमगिरी, माळीण, राजगुरूनगर परिसरात जोरदार सरी पडल्या. आज रविवार सुट्टी असल्यामुळे नागरिकांनी घरीच थांबण्यास प्राधान्य दिले. त्यामुळे शहरात पावसामुळे वाहतूक मंदावली तरी कोंडी कमी झाली. दरम्यान, पुढील दोन दिवस शहरासह जिल्ह्यात आकाश सामान्यत: ढगाळ राहील, तर पावसाच्या मध्यम ते जोरदार सरी पडतील, असा अंदाज पुणे वेधशाळेने वर्तविला आहे.

अनेक नद्यांना पूर..
घाट विभागात आज दिवसभर धो-धो पाऊस सुरू आहे. त्यामुळे मुळशी, भोर, वेल्हा यासह मावळ परिसरात अनेक नद्यांना पूर आला असून, पुलावरून पाणी वाहू लागल्याने गावांचा संपर्क तुटलेला आहे. गेल्या २४ तासांत डुंगरवाडी घाटमाथ्यावर सर्वाधिक १०१ मिमी पावसाची नोंद झाली, तर ताम्हिणी घाट परिसरात ६०, कोयना येथे ६३, लोणावळा परिसरात ७२, भिवपुरी येथे ८३, वळवण घाट परिसरात ६७, भिरा येथे १४५ मिमी पावसाची नोंद झाली. दरम्यान, पुढील २४ तासांत पुणे जिल्ह्यातील घाट परिसरात मेघगर्जना आणि वादळी वाऱ्यासह जोरदार ते अतिजोरदार पावसाची शक्यता असल्याने पुणे वेधशाळेकडून ऑरेंज अलर्ट दिला आहे.

शहरासह जिल्ह्यातील पाऊस (मिलिमीटरमध्ये)
निमगिरी ४०, माळीण ३५, राजगुरूनगर २०, पाषाण १०, चिंचवड ८, शिवाजीनगर ६, तळेगाव आणि कोरेगाव पार्क ५, मगरपट्टा, हवेली आणि हडपसर येथे ३.