Pune: धायरी परिसरातील स्वानंद प्राथमिक विद्यालयात आंतरराष्ट्रीय योग दिन मोठ्या उत्साहात साजरा करण्यात आला. विद्यार्थ्यांमध्ये योगाबद्दल जागरूकता निर्माण करणे, तसेच त्यांच्या शारीरिक व मानसिक आरोग्याचे महत्त्व पटवून देणे हा या कार्यक्रमाचा मुख्य उद्देश होता.

​कार्यक्रमाची सुरुवात प्रार्थनेने झाली. त्यानंतर विद्यालयातील शिक्षकांनी विद्यार्थ्यांना योगाचे महत्त्व आणि योग दिन साजरा करण्यामागची पार्श्वभूमी समजावून सांगितली, तसेच नियमित योगाभ्यास करण्याचे आवाहन केले.

​या प्रसंगी ‘सहजयोग परिवार’, पुणे या संस्थेतील वैशाली रायकर, साधना काळे, प्रियांका सोनार, नीलम अढुळकर व वरद बावळे इत्यादी सदस्यांची प्रमुख उपस्थिती होती. विद्यालयाच्या मुख्याध्यापिका डॉ. श्रुती मनोरे यांच्या हस्ते सर्व उपस्थितांचा सत्कार करण्यात आला.

​कार्यक्रमादरम्यान साधना काळे यांनी विद्यार्थ्यांना ‘आंतरिक शक्ती जागृत करणे’ या विषयावर मार्गदर्शन केले. या प्रसंगी विद्यार्थ्यांनी सूर्यनमस्कार, ताडासन, वृक्षासन, भुजंगासन, प्राणायाम आणि मंडल योगा अशी विविध योगासने उत्साहाने केली.

​कार्यक्रमाचे सूत्रसंचालन व आभार प्रदर्शन विद्यालयाच्या शिक्षिका मोहिनी पिंपळगावकर यांनी केले. या उपक्रमामुळे विद्यार्थ्यांमध्ये आरोग्याबाबत एक सकारात्मक दृष्टिकोन निर्माण झाला आहे.