पुणे – स्त्री शिक्षणाची मुहूर्तमेढ रोवणाऱ्या आणि स्त्री शिक्षणासाठी आपले आयुष्य वाहून घेतलेल्या सावित्रीबाई फुले यांच्या नावे पुणे विद्यापीठ असल्याचा अभिमान आहे, असे प्रतिपादन सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांनी केले. सावित्रीबाई फुले यांच्या १९३ वी जयंतीनिमित्त सावित्रीबाई फुले पुणे विद्यापीठात ज्ञानेश्वर सभागृहात व्याखानाचे आयोजन करण्यात आले होते. याप्रसंगी ते बोलत होते. यावेळी विद्यापीठाच्या मुख्य इमारतीसमोरील सावित्रीबाई फुले यांच्या पूर्णाकृती पुतळ्याला कुलगुरू डॉ. सुरेश गोसावी, हैद्राबादमधील ईएफएल विद्यापीठाच्या माजी प्र-कुलगुरू प्रा.डॉ.माया पंडित- नारकर, प्र-कुलगुरू डॉ. पराग काळकर, प्रभारी कुलसचिव प्रा.डॉ. विजय खरे, व्यवस्थापन परिषदेच्या सदस्या बागेश्री मंठाळकर, डॉ. संदीप पालवे, डॉ. रवींद्र शिंगणापूरकर, ज्योत्स्ना एकबोटे, वित्त व लेखा अधिकारी चारूशिला गायके, अर्थशास्त्राचे विभागप्रमुख डॉ. विलास आढाव, डॉ. मनोहर जाधव आदींनी पुष्पहार अर्पण करून अभिवादन केले. समाजातील असमानतेमुळे स्त्रीयांना शिक्षण घेता येत नसताना सावित्रीबाईंनी असामान्य धैर्य दाखवत स्त्री शिक्षणाची मुहूर्तमेढ रोवली. नकारात्मक प्रथेवर बंदी घालण्याचे काम करून प्रगतीशील समाजाचा पायाही त्यांची रचला असल्याचे डॉ. गोसावी सांगितले. सावित्रीबाईंनी त्यावेळी समाजातील महिलांना शिक्षणाद्वारे त्यांच्या मुक्तीची द्वारं कशी उघडता येईल हे सांगून ज्ञानाच्या उर्जेतून येणारा आत्मविश्वास त्यांना मिळवून दिला. सावित्रीबाई स्त्रीयांना नुसत शिक्षण देऊन थांबल्या नाहीत तर त्यांच्यावर होणाऱ्या विविध अत्याचाराच्या विरोधातही त्या उभ्या राहिल्या त्यामुळे त्यांना स्त्री मुक्तीची जननी म्हणणे वावगे ठरणार नाही, असे प्रतिपादन प्रा.डॉ. माया पंडीत- नारकर यांनी केले. कार्यक्रमाचे प्रास्ताविक डॉ. बाबासाहेब आंबेडकर अध्यासनाचे प्रमुख डॉ.मनोहर जाधव यांनी केले. सूत्रसंचालन शिक्षणशास्त्र विभाग प्रमुख डॉ. गीता शिंदे यांनी केले.
