Pune Police Raid – खराडी परिसरातील स्पाच्या आड सुरू असलेल्या सेक्स रॅकेटचा पोलिसांनी पर्दाफाश केला. ‘फील टच स्पा’मध्ये बनावट ग्राहक पाठवून खात्री केल्यानंतर पोलिसांनी छापा टाकत स्पा मॅनेजर राधिका (३८) हिला ताब्यात घेतले. तसेच, नागालँड येथील २६ वर्षीय महिलेची सुटका करण्यात आली. स्पासाठी जागा उपलब्ध करून दिल्याच्या आरोपावरून जागेची मालकीण मनीषा (५४) हिलाही आरोपी करण्यात आले आहे.

खराडी परिसरात स्पाच्या नावाखाली अनैतिक व्यवसाय सुरू असल्याची माहिती पोलिसांना मिळाली होती. त्यानुसार पोलिसांनी एका बनावट ग्राहकाला फील टच स्पामध्ये पाठविले. सिटी विस्टा इमारतीच्या विंग-एमधील पहिल्या मजल्यावर हा स्पा आहे. बनावट ग्राहकाला पूर्वी नोंद केलेल्या क्रमांकाच्या ५०० रुपयांच्या आठ नोटा, म्हणजेच चार हजार रुपये देण्यात आले होते. बनावट ग्राहक सायंकाळी सुमारे ५.०५ वाजता स्पामध्ये पोहोचला.

त्याने मसाज तसेच ‘एक्स्ट्रा सर्व्हिस’बाबत विचारणा केली. त्यानंतर त्याच्याकडून चार हजार रुपये घेण्यात आले आणि त्याला स्पामधील रूम क्रमांक दोनमध्ये एका महिलेकडे पाठविण्यात आले. अनैतिक सेवेचा सौदा झाल्याची खात्री होताच बनावट ग्राहकाने पोलिसांना ठरल्याप्रमाणे इशारा केला. यानंतर पोलिसांच्या पथकाने सायंकाळी सुमारे ५.४० वाजता स्पावर छापा टाकला.

छापा टाकल्यानंतर स्पाची मॅनेजर व संचालक राधिका हिला ताब्यात घेतले. तसेच स्पाच्या काउंटरवरील बनावट ग्राहकाकडून घेतलेले चार हजार रुपये व १८ हजार ५०० रुपये रोख आणि दोन मोबाइल फोन, पेटीएम यूपीआय मशिन, सीसीटीव्ही डीव्हीआर, रेट कार्ड आणि अन्य साहित्य जप्त केले. जप्त साहित्याची एकूण किंमत सुमारे ७४ हजार रुपये असल्याचे पोलिसांनी सांगितले.

स्पामध्ये काम करणारी २६ वर्षीय महिला नागालँडची रहिवासी असून, ती गेल्या सुमारे दोन वर्षांपासून तेथे काम करीत होती. तिला दरमहा २५ हजार रुपये वेतन दिले जात असल्याचे तपासात निष्पन्न झाले. दरम्यान, स्पासाठी जागा उपलब्ध करून देण्यासाठी फेब्रुवारी २०२६ मध्ये भाडेकरार केल्याचे तपासात समोर आले आहे.

मनीषा हिने जागा उपलब्ध करून देत राधिका हिच्यासोबत संगनमताने अनैतिक व्यवसाय चालविल्याचा पोलिसांचा आरोप आहे. याप्रकरणी दोघींविरुद्ध खराडी पोलीस ठाण्यात संबंधित कलमांनुसार गुन्हा दाखल करण्यात आला असून, पुढील तपास सुरू आहे.