Pune Police – आंदोलनावेळी परिस्थिती चिघळून दगडफेक झाल्याने तात्काळ हस्तक्षेप करून परिस्थिती नियंत्रणात आणली. या प्रकरणी दोन्ही पक्षांवर कायदेशीर कारवाई केली असून दोषींवर कठोर कारवाई होईल. आयुक्त म्हणाले, पोलिसांना आंदोलन हिंसक होईल अशी पूर्वकल्पना नव्हती. दगडफेक, हिंसाचार होण्याची गुप्त माहिती आमच्याकडे नव्हती. अशी माहिती असती तर परवानगी दिली नसती. आता राजकीय पक्षाच्या कार्यालयावर किंवा नेत्यांच्या निवासस्थानावर आंदोलन करण्यास परवानगी दिली जाणार नाही. महापौरांच्या उपस्थितीत आंदोलन होऊनही त्यांच्यावर गुन्हा का दाखल केला नाही, या प्रश्नावर आयुक्त म्हमाले, पोलिसांकडे प्राप्त झालेल्या फिर्यादी गुन्हा नोंदवण्यात आला आहे. तपासात जो दोषी आढळेल त्याच्यावर कायद्यानुसार कारवाई होईल.काँग्रेस भवनवरील आंदोलन हिंसक होईल अशी कल्पना नव्हती. भविष्यात अशा घटना टाळण्यासाठी पोलिसांकडून खबरदारी घेतली जाणार आहे. अशा स्वरूपाच्या आंदोलनांना परवानगी दिली जाणार नाही. काँग्रेसकडून पोलिसांवर करण्यात आलेले आरोप फेटाळत आयुक्तांनी सांगितले की, पोलिसांनी नियमानुसार आणि कायद्यानुसारच कारवाई केली असून त्यांच्या आरोपांमध्ये कोणतेही तथ्य नाही. घाटे, शिंदे यांच्यावर गुन्हा रविवारी काँग्रेस भवन परिसरात भारतीय जनता पक्षाच्या आंदोलनावेळी झालेली झटापट, तसेच दगडफेकीनंतर भाजप, काँग्रेस कार्यकर्त्यांनी शिवाजीनगर पोलीस ठाण्यात परस्पर विरोधी फिर्यादी दाखल केल्या. त्यानुसार भाजप शहराध्यक्ष नगरसेवक धीरज घाटे, तसेच काँग्रेस शहराध्यक्ष, नगरसेवक अरविंद शिंदे यांच्यासह कार्यकर्त्यांविरुद्ध गुन्हा दाखल झाला आहे. काँग्रेस भवन आंदोलन काँग्रेस प्रदेशाध्यक्ष हर्षवर्धन सपकाळ यांच्या वक्तव्याच्या निषेधार्थ रविवारी भारतीय जनता पक्षाच्या झालेल्या आंदोलनावेळी दोन्ही पक्षांच्या कार्यकर्त्यांमध्ये झटापट, दगडफेक झाली. यात काँग्रेसचे तीन, भाजपचे दोन, दोन पोलीस, दोन पत्रकार किरकोळ जखमी झाले. त्यानंतर रात्री उशीरा भाजप शहराध्यक्ष नगरसेवक धीरज घाटे, युवा मोर्चाचे पदाधिकारी दुष्यंत मोहोळ यांच्यासह ५० ते ६० कार्यकर्त्यांविरुद्ध गुन्हा दाखल करण्यात आला. याबाबत काँग्रेसच्या कार्यकर्त्या प्राची दुधाणे ( ४२, रा. दुधाणेनगर, कर्वेनगर) यांनी फिर्याद दिली आहे. याचा तपास गुन्हे शाखेचे पोलीस निरीक्षक अमर काळंगे करत आहेत. भारतीय जनता पक्षाचे पदाधिकारी पुनीत श्रीकांत जोशी ( ३५, रा. आयडियल काॅलनी, कोथरूड) यांनी दिलेल्या फिर्यादीनुसार, काँग्रेसचे पदाधिकारी अरविंद शिंदे, गौरव बाळंदे, अक्षय जैन, सागर धाडवे आदी कार्यकर्त्यांविरुद्ध गुन्हा दाखल केला आहे. सहायक पोलीस निरीक्षक संजय पांढरे तपास करत आहेत. काँग्रेस भवनवर रविवारी झालेल्या आंदोलनावेळी दगडफेक झाल्याने आता पक्ष कार्यालय किंवा नेत्यांच्या निवासस्थानांवर आंदोलन करण्यास बंदी घालण्याचा महत्त्वाचा निर्णय पोलीस आयुक्त अमितेशकुमार यांनी जाहीर केला. रविवारच्या घटनेचे वर्णन अत्यंत दुर्दैवी असे करून आयुक्त म्हणाले, पोलिसांनी वेळेवर मध्यस्थी करून कायदा व सुव्यवस्था राखली.
