Pune : वारजे पुलावर पेट्रोल टँकर पलटी; मोठी दुर्घटना टळली
Pune | मुंबई-बेंगळुरू बायपास हायवेवरील वारजे ओव्हर ब्रिजवर आज सकाळी भारत पेट्रोलियम समोर इंडियन ऑइलचा एक पेट्रोल टँकर पलटी झाल्याने वाहतूक ठप्प झाली आहे. सुदैवाने टँकर रिकामा असल्याने आग लागण्याचा धोका टळला आहे.
अपघातात टँकर रस्त्यात पूर्णपणे आडवा पडला, त्याचा मागील भाग रस्त्यावर अडथळा निर्माण करत होता, तर ड्रायव्हर केबिनसह पुढचा भाग पुण्याकडून मुंबईकडे जाणाऱ्या ट्रॅकवर घुसला आणि पलीकडच्या बाजूला धडकला. सुदैवाने समोरच्या बाजूने येणारे कोणतेही वाहन त्यावेळी नसल्याने मोठी दुर्घटना टळली. पलीकडच्या ट्रॅकवरही कोणत्याही प्रकारची जीवितहानी झाली नाही.
अपघातानंतर साताऱ्याकडे जाणारी सर्व वाहतूक बंद करण्यात आली असून, सध्या वाहने सर्विस रोडवर वळवण्यात आली आहेत. यामुळे सेवासुविधा रस्त्यावर प्रचंड वाहतूक कोंडी झाली आहे. प्रशासनाने परिस्थिती नियंत्रणात आणण्यासाठी वाहतूक पोलिसांना घटनास्थळी तैनात केले असून, टँकर हटवण्याचे काम सुरू आहे.
दरम्यान, या अपघाताचे नेमके कारण अद्याप समजू शकलेले नाही. प्रथमिक माहितीनुसार, टँकरच्या वेगावर नियंत्रण सुटल्यामुळे हा अपघात घडला असावा, असा अंदाज आहे. वाहनचालकाच्या प्रकृतीबाबत अद्याप माहिती मिळालेली नाही.
स्थानिक प्रशासनाने घटनास्थळी तातडीने पोहोचून वाहतूक सुरळीत करण्याचे प्रयत्न सुरू केले आहेत. नागरिकांना वारजे पुलावरून जाण्याऐवजी पर्यायी मार्गाचा वापर करण्याचे आवाहन करण्यात आले आहे.
सुदैवाने मोठी दुर्घटना टळली असली तरी अपघातामुळे निर्माण झालेली वाहतूक कोंडी लवकर सुटणे आवश्यक आहे. प्रशासनाकडून पुढील चौकशी सुरू आहे.
