पुणे – दुचाकीमध्ये सीएनजी भरत असताना गॅसचे नोझल उडून एका कर्मचाऱ्याला त्याचा डोळा कायमचा गमावावा लागला. ही घटना तीन हत्ती चौकातील एस स्वेअर सीएनजी पंपावर घडली.

याप्रकरणी पंप मालक धार्यशील पानसरे व राहीत हरकुर्ली यांच्या विरुध्द सहकार नगर पोलीस ठाण्यात गुन्हा दाखल करण्यात आला आहे. या घटनेत हर्षद गणेश गेहलोत (रा.शंकर महाराज वसाहत, धनकवडी ) या कर्मचाऱ्याला डोळा गमवावा लागला.

पोलिसांनी दिलेल्या माहितीनुसार, हर्षद हे पंपावर सीएनजी भरण्याचे काम करतात. रविवारी सायंकाळी ते एका दुचाकीमध्ये गॅस भरत होते. यावेळी अचानक गॅसचे नोझल त्यांच्या तोंडावर उडाले. यामध्ये त्यांच्या डाव्या डोळ्याला गंभीर दुखापत होऊन त्यांना डोळा गमवावा लागला. याप्रकरणी पोलीस हवालदार संदीप चव्हाण तपास करत आहेत.