प्रभात वृत्तसेवा
पुणे – शहरातील वाहतूक कोंडी फोडण्यासाठी महापालिकेने तयार केलेल्या अहवालात अवघ्या ३५ चौकांतील अनधिकृत पार्किंग आणि अनधिकृत पथारी व्यावसायिकांमुळे वाहतूक कोंडी होत असल्याचे समोर आले आहे. मात्र, या पार्किंगवरून आणि पथारीवरून महापालिका आणि पोलिसांमध्ये महापालिका आयुक्त आणि अप्पर पोलीस आयुक्तांच्या समोरच आरोप- प्रत्यारोप झाल्याने ही कोंडी फुटण्याची शक्यता नसल्याचे चित्र आहे.

शहरात लोक वाहने घेऊन येणारच. या वाहनांसाठी महापालिकेने पार्किंगची सुविधा द्यावी, तसेच पथारी व्यावसायिक अनधिकृत असले, तरी त्यांना महापालिकेने इतरत्र जागा द्यावी, म्हणजे ते या चौकांमध्ये येणार नाहीत, असा सल्ला महापालिकेलाच देत पोलिसांनी या दोन्ही कारवाईप्रकरणी हात वर केल्याचे समोर आले आहे.

शहरातील ३२ रस्ते आणि वाहतूक कोंडी होणारी ३५ हून अधिक ठिकाणे, चौकांच्या सविस्तर अहवालांवर बुधवारी महापालिकेत चर्चा झाली. या बैठकीत या विषयावर पोलीस आणि महापालिका अधिकाऱ्यांनी कोंडीचे खापर एकमेकांवर फोडल्यानंतर काही काळ गोंधळाची स्थिती निर्माण झाली होती. मात्र, महापालिका आयुक्तांनी यावर नंतर तोडगा काढू, असे सांगत बैठक पुढे नेली.

कारवाईवरून चालढकल..
शहरात एकूण २ हजार किलोमीटरचे रस्ते असून, त्यातील २०८ किलोमीटर रस्त्यांवरून ८५ टक्के दैनंदिन वाहतूक होते. या रस्त्यांवरील ६० किलोमीटर अंतरात सर्वाधिक वाहतूक कोंडी होते, तर शहरात एकूण ३५० चौक असून, त्यातील केवळ ३५ चौकांमध्येच सर्वाधिक वाहतूक कोंडी होते. त्यामुळे या चौकांमधील कारवाई तातडीने होणे आवश्यक असताना आता पोलीस आणि महापालिका मात्र एकमेकांकडे बोट दाखवत असल्याचे चित्र आहे.

या चौकांमध्ये अनधिकृत पार्किंग, रिक्षा थांबे, अनधिकृत मालवाहतूक वाहनांची पार्किंग, तसेच पथारी आहेत. या वाहनांवर पोलिसांनी कारवाई केल्यास चौकांमध्ये वाहतुकीचा वेग वाढणार आहे. मात्र, पोलिसांकडूनही त्यास प्रतिसाद दिला जात नसल्याने आता काय, असा प्रश्न महापालिका प्रशासनास पडला आहे.

सर्वाधिक कोंडी होणारे प्रमुख चौक..
फातिमानगर, रामटेकडी, हडपसर गाडीतळ, पुणे विद्यापीठ, शिमला ऑफिस, राधा चौक (बालेवाडी), वारजे, पासलकर, नवले पूल चौक, शंत्रूजय, येरवडा, खराडी बायपास, वाघोली- आव्हाळवाडी, डॉ. आंबेडकर चौक (वारजे), मुंढवा, कोथरूड बस डेपो, वनाज, विश्रांतवाडी, ५०९ चौक, धायरी फाटा, स्वारगेट, कात्रज, ताडीगुत्ता, आरटीओ, जुना बाजार, गंगाधाम, पोरवाल, लोहगाव, नाथ पै, खाने मारुती चौक.