पुणे : दौंड तालुक्यातील केडगाव येथे बेकायदेशीर गर्भलिंग निदान केल्याच्या प्रकरणात नियमांचे उल्‍लंघन झाल्‍याचे स्‍पष्ट झाले आहे. जिल्हास्तरीय समितीचा त्‍या बाबतचा चौकशी अहवाल समोर आला आहे. त्‍यानुसार पोलिस आणि आरोग्य विभागाने संयुक्तपणे कारवाईचा वेग वाढविला आहे.

या प्रकरणात आतापर्यंत अनेक आरोपींना अटक करण्यात आली असून दोन प्रमुख आरोपी अद्याप फरार आहेत. तसेच संबंधित डॉक्टर आणि रुग्णालयांविरोधात कायद्यानुसार कठोर कारवाईची प्रक्रिया सुरू करण्यात आली आहे. जिल्‍हा शल्‍यचिकित्‍सक डाॅ. नागनाथ यम्‍पल्‍ले आणि पुणे परिमंडळचे आरोग्य उपसंचालक डाॅ. भगवान पवार यांच्‍याकडून हा अहवाल राज्‍य शासनाला सादर केला आहे.

आरोग्य विभागाने दिलेल्‍या अहवालात दैनिक प्रभातच्‍या डिजीटल माध्यमात या बाबत सविस्‍तर वृत्‍त प्रसिद्ध झाल्‍याचे नमूद केले आहे. या वृत्‍ताची दखल घेत संबंधीत प्रकरणाची चौकशी करण्यात आल्‍याचेही नमूद करण्यात आले आहे.

गर्भलिंग निदान केंद्राबाबत जिल्हा शल्यचिकित्सक कार्यालय, पुणे ग्रामीण पोलिस आणि आरोग्य विभागाने तपास सुरू केला. प्राथमिक तपासानंतर यवत पोलिस ठाण्यात २० मे २०२५ रोजी गुन्हा दाखल करण्यात आला. या प्रकरणात गर्भधारणापूर्व व प्रसूतीपूर्व निदान तंत्र कलमांखाली गुन्हे नोंदविण्यात आले आहेत. एकाला अटक करण्यात आली असून दोन फरार आरोपींचा शोध सुरू आहे.

दरम्यान पुणे मंडळ आरोग्य सेवा विभागाचे उपसंचालक आणि जिल्हा शल्यचिकित्सक यांनी दौंड उपजिल्हा रुग्णालय तसेच पंचायत समिती कार्यालयाला भेट देऊन परिस्थितीचा आढावा घेतला. पीसीपीएनडीटी आणि एमटीपी कायद्यांतर्गत परवानाधारक रुग्णालयांची अचानक तपासणी करण्यात आली. पुणे जिल्ह्यातील वैद्यकीय अधिकाऱ्यांची चार पथके तयार करून दौंड शहर व तालुक्यातील विविध रुग्णालयांची पाहणी करण्यात आली.

या तपासणी दरम्यान २५ सोनोग्राफी केंद्रे, २० गर्भपात केंद्रे आणि १९ महाराष्ट्र नर्सिंग होम्सची तपासणी करण्यात आली. जिल्‍हास्‍तरीय समितीने सहा जून रोजी केलेल्‍या तपासणीत लवांगिरे हॉस्पिटलमध्ये पीसीपीएनडीटी कायद्याचे उल्लंघन झाल्याचे आढळून आल्याने संबंधित मशिन सील करण्यात आले असून न्यायालयात खटला दाखल करण्याची प्रक्रिया सुरू आहे.

तसेच सदर प्रकरणात एमटीपी कायद्याच्या तरतुदींचे उल्लंघन, आवश्यक नोंदी व कागदपत्रांतील त्रुटी आणि वैद्यकीय प्रक्रियेमधील गंभीर अनियमितता आढळून आल्याचे समोर आले आहे. या पार्श्वभूमीवर यवत पोलिस ठाण्यात विविध कलमांसह वैद्यकीय गर्भपात अधिनियम १९७१ अंतर्गतही गुन्हे दाखल करण्यात आले आहेत.